E compania Island Watersport N.V. Di Philip Merryweather ta existi desde 1992 caba y tin tres diferente localidad pa haci negoshi, cu ta na Eagle Beach, dilanti RIU Hotels y Marriott Hotel. Dia 1 di februari 2018 e compania a demanda Gobierno den un caso sumario na Corte, despues cu a benta su kiosco abou y move for di e sitio. El a pidi Hues pa prohibi Gobierno pa stroba nan operacion, te ora Corte den Prome Instancia tuma un decision. A pidi e Magistrado pa impone un “dwangsom” di 1 miyon florin, si Gobierno no cumpli.
Mas ainda, abogado mr. David Kock a demanda den nomber di su cliente, pa den e caso sumario, pa Hues impone un “ordemaatregel” di no menos cu 250 mil florin, den caso cu stroba su operacion den e proceso di e caso ainda. Teniendo cuenta cu di dia 21 di januari 2018, ya Gobierno a manda un carta pa e compania instruyendo nan pa desaloha e luga inmediatamente, cu a dicidi mesora pa bay di acuerdo cu e “ordemaatregel”.
Corte a impone Ordemaatregel contra Gobierno
Teniendo na cuenta e desaroyonan y e forma con Gobierno ta atendiendo cu e asunto aki, dor di yega y kibra kiosco pa desaloha e companianan, Hues awe a dicidi mesora pa prohibi Gobierno di kita e kiosco na altura di Marriott Hotel of di stroba e compania di opera den tur trankilidad eynan.
Tur esaki pendiente pa tratamento di e caso sumario. Hues a impone un “dwangsom” di 100 mil florin pa dia of parti di cada dia cu Gobierno no cumpli cu e “ordemaatregel” aki.