Durante conferencia di prensa yama pa Gobierno di Aruba, reportero Marko Espinoza a trece un punto dilanti cu su persona a experencia durante un bishita recien na Hulanda, cu tawata tin hopi interes di Departamento di Recurso Humano (DRH) pa locual ta reclutamento di e hobennan cu a gradua, pa por bolbe nan isla natal.
Espinoza a señala cu durante su estadia na Hulanda, a sinti cu un di e preocupacionnan tawata kico Aruba por ofrece, e salario y e posibilidad di traha un carera. E reportero a mustra cu durante un di e encuentronan na Hulanda un hoben a mustra cu no tin garantia cu na Aruba lo corta e fenomeno di “friends and family” cu a tuma luga durante diferente gobernacion di diferente signatura.
A agrega cu actualmente tin scarsedad di trahadonan local den aparato gubernamental, mientras cu tin un tendencia cu mas Hulandes ta tumando over posicion den diferente departamentonan di gobierno. Riba pregunta di reportero Espinoza, Prome Minister mr. Evelyn Wever-Croes a contesta cu ya a informa e hobennan Rubiano di kico ta e posibilidadnan pa forma un carera na Aruba.
E mandatario e splica cu a duna informacion riba e cambionan cu ta implementando den nos sistema salarial, pa den e organisacion gubernamental por brinda careranan mas interesante na loke yama “kader personeel”cu ta e personanan profesional cu ta bin cu nan estudio, esey tur ta den cuadro di landenpakket y lo ta atendi den e siguiente temponan nos dilanti.
Wever-Croes a mustra riba pasado cu un minister presidente cu por tawata tin 147 hende riba su payroll sin cu nan mester bin trabao, y cu e personal tawata “cana uno ta boks den un otro, un hende asina so por a fomenta “friends and family”.” A agrega: “Ora bo ta mara manera nos (Gabinete Wever-Croes II) a impone nos mes cu un maximo di 25 persona, ora bo tin un maximo pa traha cu n’e, ami (Prome Minister) ta traha cu 23 , bo no tin luga pa friends and family.” E politico a indica: “Friends and family of nepotismo ta: ora bo ta apunta un hende cu no tin preparacion cu no tin experencia, pasobra simplemente bo conoce, pasobra ta bo famia – bo ta apunte. Den 25 hende bo no tin espacio pa haci esey”.
E politico a enfatisa: “Bo mester ta hopi cauteloso cu e cantidad limita cu bo tin pa pone, y bo ta pone hendenan cu e experticio cu e conocemento, cu e practica di trabao cu bo tin mester, bo no tin espacio pa “friends and family.” Esey mi ta kere ta algo hopi importante pa keda enfoca riba dje. Siguientemente e mandatario a haci referencia riba e comentario di Espinoza encuanto dicon hopi Hulandes ta tumando e posicionnan over. Wever-Croes a reacciona bisando cu tin hopi enfoke riba e localnan na Aruba, y a duna un ehempel manera Corte di Husticia na Aruba ta papiando di dun’e un cara “Caribense” na Corte. Den pasado e instituto di husticia tawata tin hopi Hulandes den e funcionnan clave, cu awendia pocopoco e localnan ta cuminsa ocupa e funcionnan riba diferente nivel den e instituto. E mesun cambio ta tuma luga na otro departamento Gubernamental.
A agrega cu naturalmente bo no por discrimina un persona cu por tin un apariencia “mas Hulandes cu un otro”, of por tin un fam Hulandes. Si e persona a solicita, a bin resulta cu e ta un di esunnan miho, tin un motibo pa su seleccion. “Bo no por haci e tipo di discriminacion si bo mester di profesionalnan. “Enfasis ta pa e yiunan di tera por haya e posicionnan”, asina Prome Minister di Aruba a mustra.
Di otro banda lider di Fraccion di AVP mr. Mike Eman a reacciona mustrando cu e “tipo di gañamento aki ta wordo cubri cu un cantidad di hende cu pa no pone nan bao di AZ (Bureau Algemene Zaken) di biaha, ta pone na otro departamentonan y pa bin bisa cu tin 25 hende so ta traha cu e minister.”
Eman ta señala cu cualkier hende cu bo puntra den comunidad cu ta bay regularmente na Cocolishi (Bestuurskantoor) por a conta lista di mas di shen hende den e edificio. A wak: primo, ruman, sua, tanta. Ta cuminsa na ministernan di cual tres of cuater di nan ta famia, despues ta sigui cu secretaria. Segun e politico ta accentua: “Bo no ta haya un Eman den Cocolishi, nos tawata tin alrededor di shen y pico persona cu tawata asesora nos durante periodo di gabinete Eman.
Segun e lider politico a indica cu tur e personal cu a forma parti di su gobernacion “a bin cu gabinete Eman y a bay cu gabinete Eman” y ta enfatisa cu no a duna e personal cu a forma parti di su gobernacion, un “vaste benoeming” pues cu nan a keda un peso pa gobierno. E personal cu tawata traha den staff di gobierno ta trata di personanan di confianza.
Pa loke ta e Rubianonan cu finalisa nan estudio, el a splica cu durante gobernacion di Gabinete Eman un di e prome cosnan cu a haci ta pa introduci un ley cu ta duna e studiantenan un descuento di 25% riba lening (prestamo, si nan bolbe Aruba dentro di tres aña na momento cu termina nan estudio). Despues a aumenta esaki na 35% di descuento riba studie-lening. Na final di e periodo di Gabinete Eman a haci cu “cada aflossing riba bo studie-lening ta ‘volledig aftrekbaar”, pues por desconta e suma completo; no solamente interes, cual incentivo tawata introduci durante su gobernacion hunto cu ex-minister Angel Bermudez.
Eman ta mustra:”Cu cada empeño di nos pa trece nos hendenan, ta substancia y no cu palabra”. A señala riba leynan cu a introduci pa trece nos profesionalnan Aruba, a mustra riba un instituto grandi manera TNO cu tawata treciendo Arubianonan for di TU Delft na Eindhoven.
Segun e politico a mustra cu loke e actual prome minister Wever-Croes a haci ta: “cera TNO pa no tin wowonan di profesional ta mira kico nan ta haci, y a pone papa, famia, oficina di abogado pa likida henter e proceso di haci Aruba totalmente sostenibel, cu awe Aruba no ta lidera mas riba tereno di innovacion.”
