Utilities Aruba N.V., compania doño di WEB Aruba NV y NV Elmar a entama un caso civil pa pidi Hues pa desolve contract di nan Director, drs. Franklin Hoevertsz. E ultimo aki a fungi como director desde aña 2010 y tin un contract di algo mas di 1 aña prome cu e baha cu pensioen. Hunta di Comisarionan a kita Hoevertsz for di su funcion pero no di trabou y awo a pidi Hues pa desolve su contact.
Hues a puntra e Richard Eman, Presidente di Hunta di Comisarionan si a sinta negocia cu Hoevertsz pero el a contesta cu nan no kier negocia sino ta prefera pa Hues tuma un decision, riba cual e Magistrado a puntr’e si e ta cla pa haña sorpresa tambe.
Abogado mr. Anthony Ruiz di Aruba y mr. Thomas Aardenburg di Corsou a defende e interesnan di Utilities Aruba NV mientras cu abogado mr. Hans Sjiem Fat a defende drs. Franklin Hoevertsz. Esaki ta bira di tres biaha cu Gobierno di MEP ta purba kita Hoevertsz for di trabou, dos biaha for di FCCA y awor for di Utilities Aruba NV. Ta hopi bisto cu sea Hoevertsz tin hopi malasuerte of por papia aki di persecusion politico.
Basicamente Utilities Aruba NV a bisa Hues awe cu nan no tin confiansa mas den Hoevertsz debi na decisionnan cu el a tuma cu no ta na interes di e compania. Kisas berdad el a haye for di Gobierno of di Minister, pero e mester a sali na interes di e compania. E abogadonan a referi entre otro cu Utilities Aruba NV lo a paga un suma di 38 mil pound Ingles na un corant Mericano pa promove Mike Eman. Mester menciona cu abogado defensor di Hoevertsz a aclaria cu no ta e suma di placa ey sino 45 mil florin y riba dje no tabata un propaganda pa Mike Eman sino un advertorial pa Green Conference Aruba den cual varios figura a duna entrevista riba e caminda “berde” cu Gobierno ta canando pa cu uzo di energia na Aruba. E placa ey a sali for di un fondo special di Utilities den cual otro companianan priva tambe a patrosina Green Conference.
A haci mencion cu tabata bin instruccion di Conseho di Minister pa tuma consultantnan na trabou of pa prepaga gastonan di biahe pa asuntonan di Refineria di Aruba cu Gobierno a bisa di lo paga bek despues. E hunta di comisario nobo a cuestiona e forma di traha aki, aunke cu e abogado di Hoevertsz a corda Hues cu Gobierno ta doño di e compania y por duna instruccion na su discrecion.
Basicamente kier kibra e relacion di trabou pero kier pa Hues tuma un decision. Abogado Sjiem Fat ta kere cu e caso ta mustra bon pa Hoevertsz, pues e ta masha optimista.
Hues a scucha ambos partido y a bisa cu dia 2 di april 2019 e lo tuma un decision riba e demanda, esta pa paga Franklin Hoevertsz locual tin stipula den su contract di trabou.
