Algun siman pasa DOW a anuncia e maneho di tent cu Ministerio di Infrastructura ta hiba pa esaki. Segun Marlon Croes di DOW, ainda ta ripara cu e informacion no a yega na tur hende.
Ta pa e motibo aki mes e director di DOW a trece esaki dilanti pa loke ta e proceduranan. Durante un conferencia di prensa, el a splica cu e proceso pa atende peticionnan pa tent, podium y baricada, tur peticion mester wordo entrega na DOW prome cu 20 di Februari.
Awor aki a palabra cu ministerio, cu tur peticiont a pasa via DOW. Si tin un peticion pa un tent of pa un baricada of un podium, no mand’e ministerio, pero mand’e pa DOW mes. Peticionnan mester wordo entrega 10 dia minimo prome cu e evento.
Pakico esaki ta Pasobra si bo entreg’e un dia prome, por ehempel riba un diabierna atardi, pa un evento riba diasabra, esey ta nifica cu bo ta forsa e organisacion pa bay draai overtime cu ta aumenta nan gastonan operacional pa por duna e servicio. Si hay’e dies dia prome, ta planifica e orario di trabao cu tur cos ta wordo entrega durante oranan di trabao y asina ta baha e gastonan operacional y tambe por maneha e capacidad mas miho.
E peticion cu drenta prome, lo wordo atendi prome. Esey ta un di e otro puntonan. Peticionnan pa evento di gobierno tin prioridad riba eventonan di tercer persona.
Pa esaki, mester haci uzo di formulario pa por yena. E formulario aki ta obtenibel na DOW. Ta bin busk’e of por download’e via nan pagina di Facebook pa por yen’e na cas y trec’e na DOW. Pa esaki, e peticionario mester haci pago y huur di e deposito na DOW, prome cu pone un banda p’abo. Si e peticionario ta desea transporte, costo envolvi, DOW lo calcula esaki y lo comunica na e peticionario unda cu esaki por wordo paga, unda cu DOW por cumpli cu e servicio di transporte di biaha.
Gastonan
Pa un tent comercial, mester paga 100 florin y esaki ta pa huur di cada dos dia. E borgsom pa cada tent ta 100 florin. Tent no comercial, esaki ta pa instancianan por ehempel caritativo, of un scol, esaki lo ta 80 florin pa dos dia y e 100 florin di borg pa cada tent. Podium ta 58 florin pa cada dos dia. Pa cada pida di podium y esaki tin un borgsom di 100 florin. Baricada ta 4 florin pa pida palo y stand tambe 4 florin. Esaki ta pa cada dos dia y lo tin un borgsom di 25 florin pa cada un. Pa loke ta entiero, tin un maneho cu esaki ta gratis pa loke ta baricada pa dos dia. Pa Fundacion ta depende kico e meta ta, ta evalua si tin un balor comercial of un balor cu por bisa cu por haya un kostprijs di 80 florin.
