Tabata dia 15 di september cu e team di aresto di Cuerpo Policial Aruba a cana kibra na e cas Kiviti # 29 na San Nicolas. Arestatie Team a kibra porta di e cas buscando un sospechoso bao di e nomber di Miguel Gomez. No a haya e sospechoso den e cas, pero si a kibra porta y kozijn bay aden pero awo, 5 luna despues, ainda no kier drech’e bek tampoco.
Hues a dicta na fabor di e doñonan di cas y a ordena gobierno pa responsabilisa pa e daño cometi, di forma inhusto!
Riba e dia specifico ey tabatin un acto criminal cu a tuma luga y polisnan tabata locoloco buscando e sospechoso. Algo pasa di 10:00pm, Rachelle Kock tabata drumi banda di su pareha riba cama y su yiunan den nan camber.
A scucha un zonido duro den sala y ora el a sali pa bay check ken ta bati na porta, el a topa cu e polisnan den su sala caba. Nan tabata cu cara tapa y cu un bos agresivo a grita pa tur hende drumi na suela.
Den camber di e muchanan a benta e yiunan na suela y mescos a haci cu su pareha. Nan a mara su mannan patras, tapa su cara pa despues realisa cu e no ta e sospechoso cu ta buscando. A puntra e doñonan di cas si nan conoce Miguel Gomez y ora a contesta cu no conoce y no sa ken e ta y e no ta biba den e cas ey, a kita e boei di su pareha y a sali bay sin nada.
Rachelle Kock ta conta cu el a cana un caminda hopi largo pa nan drecha e porta y por fin a haya un aprobacion. A comunica cu vocero di Ministerio Publico, Ann Angela, atrabes di email.
Ta casi tur dia Kock tabata coresponde cu ne. Angela a conseh’e, pa manda un carta pa Altocomisario di Polis, Vanessa Tjon-Kock, kende a nenga di asumi responsabilidad pa e daño cometi dor dik su polisnan na cas di Kock na Kiviti. Kock a bay bek na Ministerio Publico, splicando cu Cuerpo di Polis no ta yuda den esaki. Angela a dun’e un otro opcion, skirbi un carta pa Corte. Despues di algun luna, Kock a haya un carta bek fo’i nan, cual dia 16 di december mester a aparece dilanti di hues.
Rachelle Kock a conta cu te ainda e tin dolor di cabes y su yiunan, despues di e incidente, keto bay ta den panico. For di september e muchanan no kier drumi mas den nan camber, sino hunto den camber di nan mama. Ta sinti cu asina tin un movecion pafo di cas, ta teme cu ta polis lo kibra e porta atrobe. Polis nunca a ofrece ayudo psicologico ni pe ni pa su yiunan, aunke cu nan ta simplemente victima di un eror grave di polisnan. E mesun dia e polisnan di AT a drenta dos cas robes y a comete daño na ambos cas.
Pero tin un eror mas grave ainda: E polisnan a drenta e cas, kibra porta, abusa fisicamente di e habitantenan den e cas, den nan afan pa busca un supuesto criminal y na final a bandona e cas sin mustra un apoderacion di hues pa por a drenta e cas. Despues di 1 ora recherche a regresa e cas cu un carta firma pa fiscal mr. Pronk. E habitante ta puntra su mes si ta un fiscal por ordena pa kibra drenta cas di un hende of si ta un hues comisario. Enfin, na momento di e “inval” fracasa aki, no a presenta ningun apoderacion, pues ni di fiscal ni di un hues comisario. Ta mustra comosifuera cu polisnan a dicidi riba nan mes pa kibra e “huisvrede” di algun famia y despues pidi permiso pa locual nan a haci caba!
Rachelle Kock ta contento cu e no a “give up” y a insisti pa nan drecha su porta, cual hecho lo sosode awor tambe. Ta trata aki di un suma di 1800 florin cu lo cubri pa cumpra y drecha e porta kibra.
