Tin un problema serio andando entre gerencia di Stichting Ziekenverpleging Aruba (SZA) cu ta maneha nos hospital y Stichting Algemene Bejaardenzorg Aruba (SABA) cu ta maneha e cuater casnan di anciando na Aruba. Un problema cu a bay asina leu cu a yega te den Corte. Hospital tin den su servicio tres geriatra (dokter specialisa pa atende pashentnan adulto mayo), kendenan ta na disposicion di SABA. Pero debi na keho di e forma con ta practica nan specialisacion, SZA a dicidi di pone un paro na e servicio aki cu nan ta yuda SABA cu ne. Y pa e motibo aki SABA a dicidi di bay Corte.
Geriatra ta e ramo di medicina cu ta dedica na studia e enfermedadnan cu ta afecta personanan di edad y nan cuido. Nan ta atende cu e aspectonan clinico y otro formanan cu por yuda den tratamento, prevencion y rehabilitacion di e pashent, combinando cu aspectonan familiar y social.
Hospital door di e diferencia di opinion riba e tratamento cu ta duna clientenan di SABA, segun kehonan ricibi, a dicidi pa para e servicio aki.
Informacion cu 24.ora.com ta dispone di dje ta mustra cu e problema no tin di haber cu placa sino mas bien cu salud di e ancianonan. E keho di famianan ta cu e dokternan ta conseha / recomenda famia di personanan malo, of den fase leu, pa duna nan algo pa nan bay drumi of stop di duna nan cuminda. Esaki ta algo cu hospital, cu ta responsabel pa e tres specialistanan en cuestion, no ta di acuerdo cu ne. A purba sinta na mesa cu gerencia di SABA y cu e dokternan encuestion pero SABA ta nenga! E ora Hospital a manda informa e dokternan cu nan mester raporta bek na nan trabou original na hospital y eynan SABA a rabia y a subi trapi bay hues.
Mirando cu no por yega na un acuerdo riba e tema aki, a dicidi di para e acuerdo cu SABA entrante prome di september awo. E geriatranan den servicio di hospital awo ta drs. NAA. Smits, drs. E.S.D. Johanns y drs. J.M. Lanting.
SABA a dicidi di manda SZA Corte pidiendo pa prohibi SZA pone un paro na e servicio aki te ora cu tin un decision final den e caso di bodemprocedure. Pa e ultimo aki no tin un fecha ainda. E caso sumario mes ta dia 31 di augustus awo. Pero mientrastanto SABA, mirando fecha tratamento di e caso sumario, a haci un otro peticion na Corte. A pidi pa saca un ordo pa prohibi SZA, mientras cu e caso ta andando, di kita e specialistanan aki cu ta na disposicion di SABA. Pues cu nan por sigui atende e clientenan di SABA. Corte no a mira motibo pa bay di acuerdo cu e peticion aki y a rechas’e.
Loading…
Reload document 
Open in new tab 
