Diasabra ultimo, 22 di juli, e famoso Team Snor, bou guia di e flamante ‘Snor’ Perez, a bolbe demostra cu nan ta ‘the team to beat’ e temporada aki. Team Bou Palo, bou guia di Capitan Werleman, a lucha cu alma y cuerpo pa e biaha aki si saca cara y demostra cu nan no ta “zomaar een paar trabuco’s” cu noordoostpassaat a supla direccion di e mundialmente famoso Domino Square Garden aya na Calabas / Kudawecha.
E anochi a habri c’un “harde krak” ora cu prome wega caba Team Snor bay 1-0 dilanti pasando un clean board, un sapato blanco blanco! E barco di capitan Werleman a sacudi un rato y e zeilonan a perde tiki forsa, pero rapidamente a tuma animo atrobe y e bataya a cuminsa den ful swing! Despues di un par di wega di ‘un pa mi un pa bo’, a cuminsa bira bisto toch ken lo bay domina e anochi.
Team Snor a drenta halftime cu score confortabel di 15 – 7. E pasapalonan completamente gratis ta skeiro rond y despues di blankia djente p’e foto-shoot, e bataya a continua den tur furia. Team Bou Palo a mustra di analisa nan strategia den pauze y a lansa un atake un tiki mas impresionante, pero na final Team Snor a habri e valvenan ful trot y a crusa linea final cu score suave di 21 – 15. Na Hulanda nan lo bisa “niet gepiest, maar toch nat!”
Shonnan keda pendiente pasobra cos ta mustrando cayente n’e Domino Square Garden. E teamnan ya a cuminsa line up pa yena luna di augustus cu poco wega. Keda pendiente.
