Por a tende cu Excelsior ta pasando den momentonan dificil. Hubert Dirksz, Presidente di FTA a conta cu e problema cu berdad e trahadonan a confronta, ta cu e insiguridad a cuminsa bira mas grandi.
Tin un doño cu e trahadonan no ta mucho contento cun’e. Pesey mes nan a acerca FTA. Asina ey a bay den referendum y FTA a gana esaki. Pero e situacion no ta di gaba. E mundo di casino mes ta un punto cu den pasado a yega di papia, durante Gobierno anterior, den varios reunion cu e punto aki di casino, como producto turistico, mester wordo atendi. Mester dune bida si kier keda exitoso den e traboanan aki pa e cantidad di trahado cu tin den e sector aki.
Sa cu e doñonan cu sigur di parti di gobierno, belasting tin bon bista riba nan. Loke a pasa tempo di Aura Casino, tabata cu e doñonan na cierto momento na prome luga, no tabatin cuenta di banco. Tambe nan tabata saca placa y no tabata cumpli cu e debernan di paga belasting nan mes, ni tampoco no tabata paga sindicato (union dues cu nan ta kita di e trahadonan). Mesun cos cu tur e placa cu ta wordo kita for di e trahadonan pa paga diferente debenan cu nan tin, no tabata cumpli cun’e. Esey ta loke a pasa.
Na final a dicidi di dal porta cera y bay. Lamentablemente esey a wordo permiti y awor aki kier preveni esaki, mirando tur e desaroyo cu tin. Trahadonan a trece dilanti cu e situacion ta dificil. Doño di e edificio mes ta den proceso di trece renobacionnan. Esey ta informacionnan cu e sindicato tin. Esey ta nifica cu lo bin cambio den e casino.
Loke ta importante ta pa e trahadonan wordo perhudica. A gana e referendum. A sinta na mesa cu e abogado di e compania y ta pendiente pa un reunion cu e abogado di e compania pa firma un protocol y continua entre otro, ki acuerdo ta yega cu ta na beneficio di trahado y kico lo mester pasa si en caso e rumornan, con berdad nan ta pa por proteha e trahadonan. Ta kere cu na mesa mester por sali afo. Ta sper cu e storia no ripiti manera cu a tuma luga cu Aura Casino.
Cosnan a bay robes
Tin un diferencia den e caso aki. Na cierto momento tempo di Aura Casino, e casino a wordo cera pa supuesto renobacion. Pero na mes momento e doño a haci espacio pa baha na awa. Awor aki tambe ta wordo papia di renobacion, pero tin un diferencia kende ta e prome responsabel, cual ta e dunado di trabao, cual ta Excelsior. Pero tin un entidad cu tin e licencia. Na Aura Casino, tabata e hotel, y den e caso aki ta doño di e edificio. Contal, un hende mester para responsabel. Biaha pasa a logra pa scapa, pero e biaha aki ta un reto pa esaki no pasa. Sigur si trahadonan na cierto momento mester keda den servicio of pa segun ley ta keda cu nan derechonan, te ora cu, si mester of tin motibo, relacion lo wordo desolvi. No kier papia mes ainda di un supuesto bancarota, pasobra sa cu e dunado di trabao cu no kier cumpli cu su debernan, hopi biaha ta opta pa haci diferente maniobra, contal pa no cumpli cu su debernan financiero. Den e caso aki gobierno mester ta responsabel den e parti aki pa preveni pa perhudica e trahadonan cu tin hopi aña di servicio na e casino aki.
Renobacion
Segun Dirksz, tin un punto cu a tuma luga cu durante negociacion cu e operador nobo di Aura Casino. Lamentablemente eynan a bay corte pasobra ta kere cu segun ley, un doño ta tuma un compania, ta un traspaso. Pero hues no a mir’e asina. Den e caso aki ta kere cu tin mas caminda pa cana. Sigur e casino na e hotel aki tabata exitoso tur tempo. Awor aki ta un oportunidad, si bin un renobacion, esaki lo por ta exitoso tambe, sin mester di perhudica e trahadonan. Trahadonan cu ta den servicio mester keda den servicio. Solamente mester wak e ora si ta bin un doño nobo, kico ta bay pasa. En bes di pasa den e pesadiya cu tabata tin cu Aura Casino, pa tin un traspaso mas drechi, mas decente cu ta na beneficio di tur e partidonan.
Cuanto trahado
Ta calcula cu awor aki mester tin 60 pa 70 trahado. Tin riba 30 trahado awor aki como miembro.
Cambio di doño
Ta kere, cu por tin un cambio di doño, mirando e desaroyo cu tin na e hotel, por tin cambio na caminda, pero no tin nada concreto ainda.
FTA tin combersacion cu gerencia di hotel, pero nan tampoco no ta mucho na altura di kico ta pasando pa loke ta e cambionan cu lo mester bin.
E derecho di e trahadonan ta keda a base di ley, Dirksz a splica por ultimo.
