Countdown a cuminsa pa final di 2020 y 2021 ta mas cerca cada bes. Asina nos ta yega na final di un aña impactante. Aruba completo por ta sumamente orguyoso con e profesionalnan a maneha un aña cu tabatin asina hopi impacto mundialmente y tambe riba Hospital y comunidad di Aruba. P’esey dr. Horacio E. Oduber Hospital kier a trece alegria den tur hende nan curason bailando y gosando den forma di un video di fin di aña.
Departamento di Comunicacion di HOH a traha un plan completo di un clip di fin di aña cu tur e artistanan di Hospital di diferente departamento y nacionalidad.
Siguientementa a tuma contacto cu nos orguyonan esta Jeon y Chendell Beaumont cu no a duda ningun momento pa join e clip y deleita Hospital y Aruba cu nan tremendo cancion “Ta mi hendenan”. Un gradicimento ta bay tambe na tur colega cu a participa den e clip pero tambe e crew compelto “behind the scenes”.
Tambe un danki grandi ta bay na e team di produccion di compania Awareness cu ta consisti di Gleison Mateus, Jason Inesia y Jorgy Mateo y sin laga afo Jesse McJanet di Swingmasterz.
Depues di un aña asina pisa ta momento pa pone sonrisa riba cara di coleganan cu ta traha den cuido y alabes tuma e momento pa gradici comunidad di Aruba completo pa nan sosten y apoyo durante 2020! Pa mira e video por subi pagina di Facebook di Hospital y gosa cu tur e colega di HOH. Feliz dianan di fiesta pero sigur sigui cuida curpa y stay safe!
