Diabierna mainta algo prome cu 11’or riba social media hendenan a cuminsa post cu un hos a forma. Esaki a trece cu hopi hende a cuminsa saca potret y pone esaki riba social media. E hos a forma den e parti pa nort di Aruba, unda cu na diferente parti di Aruba por a mira esaki.
Algun turista den area di Natural Bridge a wak e hos hopi di cerca, den area Blackstone Beach tambe. Segun Departamento Meteorologico di Aruba (DMA) e hos no a subi tera y algun minuut despues a somenta.
E nubianan skur si a keda den area di Alto Vista y Noord pa algun bon rato. Por observa algun biaha e hos a purba di regenera.
