Den fin di siman Colegio Arubano a tene un Open dag pa e alumnonan di klas 6 di scol basico y tambe pa esunnan cu a caba of ta cabando Mavo y nan mayornan. Alabes e alumnonan cu ta bishita Colegio Arubano caba y lo kier a haya mas informacion di un profiel of tambe di un estudio den exterior of na Aruba a bishita e Open dag.
E Open dag tabata sumamente bon bishita. Tur e seccionnan a prepara un presentacion di e contenido di nan materia pa asina ricibi e (futuro) alumnonan y nan mayornan. Un mainta sumamente exitoso caminda cu tur e servicio clubnan y e conseho di alumno di Colegio Arubano tambe a duna informacion y a yuda guia e alumnonan y mayornan. Hopi mayor a duna bon comentario y a keda cu bon impresion di Colegio Arubano.
Riba nivel di HAVO/VWO, Colegio Arubano ta e scol secundario mas grandi na Aruba, cu ta conta cu casi 1400 alumno y un cuerpo di docente y profesionalnan bon prepara y cu animo pa guia nos hobennan. Colegio Arubano ta un scol catolico habri pa tur religion, e tin un plan di pago pa e bukinan di estudio, e ta un scol solido cu mas di 64 aña di existencia, caminda cu a forma y prepara hopi di nos profesionalnan na Aruba.
Colegio Arubano ta organisa banda di su curiculo hopi actividad y proyectonan na Aruba y den exterior. Asina tin e proyecto Erasmus+, e biahe di e grupo VWO 5 pa Hulanda y tambe e show musical cu lo tuma luga 24 di maart venidero den Cas di Cultura. Colegio Arubano kier a gradici specialmente su cuerpo di docente, alumno y profesional cu a yuda cu e Open dag. Tambe e hoben- y mayornan pa nan interes den nos scol. Alabes gradici su Excelencia Minister di Enseñansa, Endy Croes, ken a tuma su tempo pa pasa na nos Open dag y ricibi informacion di nos scol. Colegio Arubano por wak bek riba un Open dag sumamente exitoso.
