Riba e bunita fecha aki, esta 22-2-22, un total di 25 miembro di personal di Dienst Gevangeniswezen Aruba (KIA) a ricibi nan decreto gubernamental (Landsbesluit) di gratificacion pa a traha temporalmente den e funcion di Ploegcommandant. Director di KIA, Gino Winklaar, compaña pa demas miembronan di directiva a hiba palabra y a felicita e grupo aki pa a tuma e encargo extra aki desde aña 2014.
Na e ocasion aki a haci entrega tambe di e Challenge Coin conmemorando e logro di mantene tur cliente di KIA “COVID-19 free” durante no menos di 2 aña largo! Esaki ta un logro colectivo di henter e personal di KIA cu e apoyo incondicional di Dr. Aron Verschuur. Pa por a logra cu ningun preso a contagia cu Covid, mester a eherce ‘contact tracing’ pa asina limita e chens pa e virus contagia tur otro y specialmente e personal di prizon.
E prome binticinco empleado a ricibi e moneda conmemorativo aki, pero e intencion ta pa parti e mesun moneda na henter e personal di Dienst Gevangeniswezen Aruba (KIA). Director di KIA, Gino Winklaar, a sigura cu e logro aki no tabata facil y a rekeri sosten y sacrificio di tur nan empleadonan. Ta hunto a haci pa, ora cu tur hende por a keda cas y isola nan mes di caya, pa nan trahadonan si sigui traha tur dia y percura pa nan mes mobilisa di tal forma cu ta wanta e virus pafo di e murayanan di prizon.
E aparicion di e director di KIA awe a bini di sorpresa, despues cu recientemente Minister Rocco Tjon a informa cu e no por drenta KIA pa su mesun siguridad. Parce cu lo a menasa e ex-alto inspector di polis, awendia director di KIA, cu morto. E menasa no por ta mucho serio si, pasobra cu dos cuerpo arma den KIA, esta e personal di KIA mes y di CEA, ta con por tin menasa contra dje eyden. Minister a instrui Winklaar pa no drenta KIA sino traha for di un oficina di KIA situa na Balashi.
Contrario na e imagen cu ta purba crea eyfo cu tin problema y cu e personal ta rabia of nan no kier Gino Winklaar mas na cabes di e instituto coreccional, awe por a mira caranan contento di trahadonan orguyoso di nan logro y di nan director. Un mensahe completamente diferente na locual gobierno ta purbando di manda eyfo, como pretexto pa move Winklaar di su funcion.
Korrectie Instituut Aruba, KIA, a muda pa su localidad na Santo di Patia na San Nicolas dia 22 di september 1990, pues 31 aña pasa. E prizon tin un populacion di un maximo di 200 detenido, parti den detencion preventivo, seccion di hende muhe y seccion di hubentud. Na KIA tin mas o menos 180 empleado trahando 24 ora pa dia pa garantisa siguridad y atende cu e presonan den cuadro di e periodo cu nan mester sinta nan castigo cu e meta pa coregi nan erornan y sali atrobe como miho ciudadanonan pa nos pais.
