Corte awe mainta a haya su mes obliga di laga un homber, acusa di violacion sexual liber. Esaki pa motibonan tecnico. Ta trata di e homber Paul Merveille, kende Fiscal cu hopi sentimento di duda mester a pidi pa lague bay liber te ora cu tratamento di e caso por sigui.
Paul ta acusa di a viola un mucha muhe menor di 16 aña dia 24 di april, 2019.
Fiscal a splica Hues cu esaki ta di tres biaha cu mester pospone e caso y no ta prome caso tampoco cu mester wordo posponi pa e mesun motibo. Tabatin dos otro caso di inmoralidad y uno di posesion di arma di candela cu mester a pidi posponemento di nan tratamento pa motibo di falta di algun material di prueba.
Den e caso aki e acusado ta nenga di a viola e mucha muhe pero tin un denuncia. A pidi pa laga haci test di DNA pero no tin resultado ainda. E biaha’ki e interes di e acusado di haya un un huicio husto ta pisa mas cu e interes di comunidad. E homber aki tin mas cu 300 dia cera y ta biba den un incertidumbre si e ta bay wordo condena of no. Den e momentonan aki no por trata e caso pasobra mester spera resultado di DNA, cu e acusado a bay di acuerdo pa participa.
Hues tabata kier sa di con e ta tardando asina hopi tempo, pasobra otro luna ta haci un aña cu e caso a tuma luga. Fiscal a splica cu pa motibonan tecnico, no ta manda laga haci testnan individual. Ta ora cu tin basta test di DNA pa haci, ta manda nan tur hunto. Pa e motibo aki no tin resulta di DNA di e caso aki pasobra no mand’e mesora. Esaki ta mescos cu un caso cu a tuma luga luna pasa, cu e tratamento no a sigui pasobra apenas ta bay manda un grupo di “samples” pa haci DNA den diferente caso.
E hecho cu e acusado aki tin mas cu 300 dia cera den incertidumbre, mientras cu e ta nenga, sin cu tin otro prueba di apoyo ainda, a pone cu Hues tambe tabata di acuerdo. El a bisa su abogado cu e mester haci peticion pa scucha testigo di biaha si e ta haya esey necesario.
E decision di Corte ta cu awe mainta e homber aki ta sali pero mara na algun condicion. Ta estrictamente prohibi pa e yega cerca of tuma contacto cu e victima of su famia. Y e mester raporta na autoridadnan concerni.
No tin fecha pa e tratamento sigui ya cu mester warda ki dia resultadonan di test ta yega.
