Diaranson mainta a habri cu mas cu un asistencia a wordo pidi na e casnan na Seroe Patrishi. E prome asistencia a pidi pa manda refuerso, pero despues no a haya e homber mas na e sitio.
No a dura mucho cu atrobe yamadanan ta cuminsa drenta pa un homber cu ta haci masha fastioso den e bario pero na un otro adres. E biaha’ki si polisnan a tira man riba dje y a transport’e pa warda di polis na Playa.
Segun por a compronde, e persona aki ta adicto na droga y ta abusa di alcohol. Diaranson mainta el a lanta di remate, buscando problema cu bisiñanan. E tabata insoportabel. Na momento cu polis a bay pa deten’e, tambe el a bira fastioso y a bira fresco cu nan, ya hasta e polisnan. Asina mes a logra pon’e den boei y trece poco trankilidad pa e bario.
