Homber a dal y kier a kima amigo na caminda pa Natural Bridge

759
Homber a dal y kier a kima amigo pa caminda pa Natural Bridge

Caso serio: Homber a dal y kier a kima amigo na caminda pa Natural Bridge

Posted by 24ora on Friday, September 21, 2018

Awe tardi pa 5:20pm a manda patruyanan di Polis na altura di Ostrich Farm, riba e caminda pa Natural Bridge, pa un pelea formal. A topa cu tres hende homber, dos auto, un Nissan Sentra color di oro y un Hyundai Accent color preto, ambos para memey di caminda. A comprende cu un di e hombernan no tabatin nada di haber cu e caso, sino mas bien a interveni y para e pelea entre e dos hombernan den e Hyundai Accent. Un di nan tabata herida, cu hopi sla na cara, wowo tapa, kap na cabes, nanishi y boca sangrando, etc.

 

Polis a atende cu e agresor y despues di un interogacion cortico, a detene mesora na e sitio mes.

Testigonan a conta na e sitio cu durante e pelea, a tuma nota cu e agresor tabata ranca carson di e victima y tabata basha gasolin riba dje. Den e auto en berdad a topa cu un jerrycan di gasolin riba e sienta di patras, hunto cu un paki di suafel.

E victima a admiti na Polis cu e homber a purba di cende na candela. Nos a combersa cu e victima pero e no a bisa kico tabata motibo di e pelea, pero a contesta cu “nos tin problema”. E victima a conta cu e auto tabata di dje y cu e agresor ta su bisiña y e yama Michael.

E sospechoso awor lo mester contesta preguntanan serio di Polis, relaciona cu su actonan. No solamente maltrato pisa, pero sigur e parti di cende su bisiña/amigo na candela por wordo considera como “intento di asesinato”.