Sigur controlnan anochi lo bay keda tuma luga, fuera di e controlnan rutinario durante dia. Segun Yvette Geerman di e seccion di higiena di Departamento di Salud Publico, tin hopi luga cu ta habri den oranan di anochi, fuera di e orarionan di trabao cu e personal di Departamento di Salud Publico ta funciona, no ta descarta cu lo por bay tuma luga.
Cu lo bay haci cierto control y spotchecks. Ta pone atencion riba e calidad di cuminda y durante cu nan ta prepara e cuminda, e ora por haci e inspeccion al caso. Esey no lo descarta cu lo haci’e tambe.
Solamente e no lo sosode den gruponan grandi, sino e tin cu bay den un planning. Ta haci’e anualmente, unda cu nan ta sinta cu diferente departamento pa por haci’e hunto, pa por logra e meta cu kier logra.
Tin hopi snacktruck, hopi luga ta habri fuera di e oranan di trabao. Si tin keho si, esey semper ta keda un prioridad pa departamento di salud publico. Asina cu tin un keho, cu ta fuera di oranan di trabao, e keho ta wordo atendi e mesun momento.
Carchi di salud
Carchi di salud ta hopi importante y e ta regula den ley. Tur persona cu ta traha den establecimentonan cu ta bende cuminda, ta mester pa nan tin nan carchi di salud cu nan na ordo y vigente. Na momento cu bay controla, esey ta un atencion cu nan ta duna.
Pakico e ta importante
Importante ta cu bo ta haci cierto testnan. A base di e testnan, e ta dunabo resultado y si e resultado ta duna cu e persona aki ta liber di cualkier cargado di cierto bacteria, e por opera, e por funciona den un establecimento di bendemento di cuminda. E tin su duracion. Minimo e ta 10 dia di trabao y tin cu pone atencion riba dje, ora cu hendenan bin aplica pa nan carchi di salud, nan ta bin aplik’e na departamento di salud publico. Despues nan mester entrega nan sushi. E dies dianan ta cuminsa na momento cu nan entrega nan sushi na laboratorio. E tambe tin su dianan cu nan mester tuma luga prome cu nan por analisa e sushi. No ta momento cu bo haci aplicacion na Departamento di Salud Publico, e dies dianan aki ta conta. Si e persona cu ta pa prome biaha ta aplica, e tin cu haci un torax tambe. Ora cu haya tur e resultadonan, y nan sali bon, e persona e ora por bin na remarca pa su carchi di salud, cual cu tin un duracion di un aña.
Permiso
Den pasado a bisa cu tur hende mester bin haci checkeo. Departamento di Salud ta pone atencion riba esaki tambe. Na momento cu un persona bin haci aplicacion, e mester por ta inscribi na censo y a base di identificacion, nan por bin na remarca pa un carchi di salud.
Ta hopi importante, na momento cu un persona bira malo, ki sintoma por tin, yama Departamento di Salud Publico. Mas bo tarda, ta haci pa e departamento un tiki mas dificil pa por trace back, si ta door di e cuminda cu b’a bira malo. Na momento cu tin cierto sintoma, haci’e na e mesun momento of e siguiente dia. E otro cos importante ta, pa acerca bo dokter di cas of bay Eerste Hulp. Departamento di Salud Publico ta traha hunto cu Eerste Hulp, di manera pa bo haci cierto testnan pa por analis’e, pa por wak si enberdad ta door di e cuminda cu a bira malo. Departamento di Salud Publico ta sigui tur loke ta bay riba social media, pero tin momento no tin cierto informacionnan, no tin nomber, ni number di telefon, unda cu por yama e hendenan aki pa por haya mas informacion.
Mester haci un intake, mester haci un research pa wak kico a pasa cu e hendenan aki cu a bira malo. Si ta berdad ta door di e cuminda. Cualkier momento, cualkier sintoma cu sinti, cu segun bo ta door di cuminda, no duda di yama Departamento di Salud Publico. E ora eynan, pa nan e por haci e trabao hopi mas eficas, mas al caso, na e mesun momento pa por bay haci nan inspeccion, pa por haya muestra di cuminda y tambe departamento di malesanan contagioso por haci nan investigacion y por bisa berdad kico a bay robes y unda tin cu wordo coregi.
E parti di intoxicacion di cuminda, no ta algo pa haci wega cun’e, pasobra e por tin consecuencianan hopi grave.
