Na Hospital tin un situacion explosivo. Aki trahadornan den Sala di Operacion y tambe den Radiologia ta cla pa pone trabou abou y walk out. Ademas di ta traha den un ambiente malo cu holor di Diesel, nan ta bay cas tur na holor di Diesel pega riba nan paña. E dos departamentonan aki ta uno crucial na Hospital y tipo di holornan asina no por ta presente ningun momento. Pa colmo e contratista parce no ta tumando Hospital na serio. A bay traha un boiler cu ta keinta e awa pa Hospital net banda di e airconan cu e schoorsteen. E huma cu ta sali ta wordo chupa den e sistema di airco causando un problema serio. For di tempo a pone e boiler e problema aki tey. A bisa e contratista cu no por pone e boiler na e lugar unda cosnan di airco ta. A spierta e contratista pero nan no ta worry. Gerencia di Hospital ta na altura pero parce nan no ta haci nada. Hasta carta a bay pa diferente departamento y minister tambe. Trahadornan no kier traha eynan mas den Sala di Operacion y Radiologia. Si e huma drenta un biaha mas nan ta pone trabou abou. Parce e contratista tin un actitud manera esnan na Hospital no sa di nada y ta haci loke nan kier. A tende cu mas biaha a pega cu e contratista. Awor Hospital ta pega cu un problema serio pasobra un molester mas den sala di Operacion y Radiologia, ta walk out. Spera cu esnan cu a haya carta tuma e asunto aki na serio y urgente.
