Diadomingo, pa mas of menos 1’or di marduga, a presenta na Warda di Polis e dama di inicialnan P.B pa un caso di robo. El a declara cu pa mas of menos 12’or y 15 di mey anochi, su yiu homber DB y su amigo H, a wordo horta pa dos hende homber na altura di McDonald‘s na Palm Beach. H. a declara cu DB y un otro amigo tabata dilanti di dicho luga. Dado momento nan a wordo acerca pa dos homber y a puntranan pa droga (marihuana). H. a sigui declara cu e momento eynan, e hombernan a ranca na e heuptas di H. y core bay. DB y su otro amigo a core bay y a laga H. atras. Finalmente e hombernan a logra bay cu tas di H. direccion p’ariba, tras di Wendy’s. Polis a puntra H. si el a mira un arma di candela, cual H. a declara cu no. Tambe el a splica cu un di e hombernan aki a bis’e cu si e no entrega e tas, e lo wordo maltrata. H. a duna un descripcion di e dos hombernan aki. Un di nan ta color cla, dreadlocks blond cu kralchinan color roos den dje. E tabata lomba sunu. Tanto su brasanan y pecho tabata yena cu tatoo. Tambe e tabata tin un carson cortico cora bisti cu strepi blauw den dje. E otro tambe tabata tin un carson cortico cora cu strepi blauw. E tabata di color bruin cla, ta un tiki hancra y tambe tabata lomba sunu. Den e tas tabatin un Apple iPhone 6S (pink & gold) y un yabi di cas cu un hanger di Colombia. Remarcabel ta cu ora a asalta e hobennan, ni H ni DB a meld e incidente. Recherche lo tuma contacto cu e denunciante pa asina investiga e keho.
