Diasabra, dia 2 di november, tabata celebracion di Dia di tur Difunto y e dia aki a invita parokianonan pa bin drecha kelder of graf di nan famia, di nan sernan keri cu ta dera den santana y tabata un dia pa corda riba e difuntonan y tambe pa resa un rosario na e grafkapel.
Noris van Lis-Donata, presidente di comision di Santana di Noord desde 2010, a comenta cu e santana aki ta uno bendiciona y tin un grafkapel den cual e restonan di e prome pastoor fiho di Aruba ta dera na 1821.
Ta considera e edificacion aki como un monumento. E comision a dreche y awor aki ta uno bunita y diasabra a drecha rosario pa descanso di alma di e difuntonan.Tin hopi parokiano ta bin, como tambe muchanan jong. Tin bon respons y no riba e dia aki so ta bin santana, sino for di comienso di siman caba nan ta bin santana pa drecha.
Durante dia por mira hende den santana.Esaki ta un parti di nos cultura, caminda cu nos antepasadonan tabata tin e religion catolico y nos a sigui cun’e. Sigur e ta un parti di un tradicion segun van Lis-Donata. Parokia di Noord a cuminsa cun’e y por mira cu e hobennan awo ta tum’e over. Ta bunita pa resa y recorda e sernan keri cu a biba cu nan y ora nan fayece, toch ta recorda nan tur aña.
Grupo ScoutGrupo San Dominico Scout di Noord tabata den santana tambe pa asina recorda e dia. Segun lider di e grupo, Sharline Farro, a comenta cu e ta parti di e programa scout.
Parti di e programa scout ta cubri areanan di crecemento y un di nan ta e parti spiritual. For di siman pasa a cuminsa prepara e muchanan, laga nan bay cas, busca informacion kende di nan sernan keri a bay shelo sosega y nan por a bin cu informacion di unda nan tin un ser keri dera den e santana. E ora ey a laga nan traha un flor. A uza e mesun flornan simbolico cora di St. Joris, pa e candela cu nan ta uza y e ora ey nan a trah’e. Ta purba di stimula e muchanan den e relacion spiritual cu e Ser Supremo y ta relaciona tambe cu e pelicula Coco.
E ta mustra cu un ser keri dibo ta muri den bo curason, na momento cu bo stop di record’e. E ora ey a siña nan con pa recorda, y resa. E grupo a para resa un rato. Ta un parti di e formacion di un hende cu bida ta cuminsa y bida ta caba. Ta importante pa e muchanan sa con pa deal, ora cu e bida caba.Siman pasa e muchanan tabata basta entusiasma. Pero door cu ta un tema delicado, a cuminsa un siman prome, puntrando nan kico nan ta pensa, kico nan ta haci. Nan a bay cas, prepara nan mes. E ora ey diasabra a prepara tambe.
Mientras cu nan tabata preparando nan flor, ta papia un rato riba e tema y ora nan a bin, nan a bin cu e meta pa rondia nan ser keri. Algun di nan por a haya y e otronan tabata tiki mas dificil. Tabata tin uno cu no tin ningun hende dera den e santana aki y tabata liber pa kies uno su mes cu el a desea di haci. Remarcabel tabata cu na momento cu el a drenta, el a wak e graf cu menos mantencion y no tabata tin nada. El a bisa cu na e graf aki e kier a pone su flor y a resa general pa tur difunto, pasobra esey ta importante, segun Farro.