Hobencita Naar tin mas cu un luna perdi

1730

Activista pa derecho di mucha, Lisette Gomes y presidente di Mi Voz ta bo Voz, den un conferencia di prensa a expresa su preocupacion pa desaparicion di un mucha muhe di 15 aña. El a haci un apelacion na henter Aruba pa coopera cu autoridadnan pa e hoben aki por ta bek na unda e tabata kedando.

Ta trata di un hoben di 15 aña, kende nan a mira pa ultimo biaha dia 10 di october, ora cu el a sali for di Orthopedagogisch Centrum na Tarabana pa un salida cu el a haya permiso di OC. Di informacion ricibi, ta bisa cu nan a mir’e riba Wilhelminapark, cu ta e mesun fecha di 10 di october. Desde e dia ey no a tende nada mas. Debi cu e ta un menor di edad, a bay hopi cauteloso cu e informacionnan y no a saca su potret. Apesar di hopi informacion ricibi, a constata cu te ainda no a logra hay’e pa cual den fin di siman a saca un poster cu su potret.  

Ultimo informe riba hobencita perdi

Posted by 24ora on Saturday, November 21, 2020

For di Wilhelminapark Lisette Gomes a papia cu prensa despues cu den fin di siman a haya e caso aki den nan man y a combersa cu mama di e menor. E mama ta hopi preocupa pa su yiu cu ta cay bou di Fundacion Guiami. E mama ta admiti cu e tabatin contacto cu e menor, pero e no tin datonan cu e por yuda pa entregue bek na OC.

El a cuestion con por ta cu un hoben di 15 aña, menor di edad, tin un luna perdi riba caya sin cu por haya informacion cu autoridadnan por busk;’e bek. Loke cu a haya tende ta cu e ta bon pero cu e no kier bolbe na e instituto. Sinembargo como menor, esaki ta algo cu e no por dicidi riba dje.

E fundacion di Gomes a bisa cu nan a pone un recompensa di 1000 florin pa esun cu por duna informacion cu ta hiba nan na su paradero. Polis tin informacion, pero no por divulga mucho cos. A haya diferente screenshot pa mustra cu e ta bon estado. No ta prome biaha cu el a huy tampoco.  E mama mes a dicidi cu e no ta haya oido pa haya su yiu bek na OC pa cual a tuma contacto cu e fundacion di Gomes.

Ta trata aki di Julie Naar, di 15 aña. Dia 22 di december awo e ta cumpli 16 aña. Ta midi 1.79, hazel eyes, cabey largo y krul.