E triatleta Eights ta den pleno preparacion pa e Weganan Odesur Hubenil cu lo tuma lugar fin di september awor na Santiago de Chile.
Den e fin di siman e hoben prospecto den e deporte di triathlon a biaha pa Palmira, Colombia unda lo competi den e campeonato Deptal de Triathlon Sprint. Recientemente Giannon a regresa despues di a permanece pa mas cu un luna na Medellin, Colombia unda e la atende un campo di entrenamento intensivo bou guia extenso di e mesun preparador fisico cu ta entrena nos atleta elite den triatlon Renze Postma. Mester bisa cu Giannon lo competi contra e miho triatletanan den su edad na Palmira, Colombia mientras na Chile e lo mester midi forza contra e mihornan den henter Sur America.
E atleta Eights tin su experiencia internacional caminda e la logra gana varios medaya pa Aruba den exterior y na Aruba mes e ta dominante den su categoria. Un danki sigur na Lotto, e Loteria di Aruba pa medio di Comision di Subsidio cu a yuda subsidia e biahe di e hoben triatleta Giannon Eights pa e Campeonato Deptal de Triathlon Sprint na Palmira, Colombia. Cumprando weganan di Lotto, e Loteria di Aruba manera Catochi, Big 4, 1-OFF, Zodiac, Wega di Number Korsou, Lotto di Dia, Lotto 5, Mini Mega, Mega Plus y weganan di Raspa bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.
