Diabierna anochi alrededor di 7:10 pm polis a presenta cu urgencia den e compleho di e casnan social na Bushiri. Aki ta caminda cu diferente persona a bati alarma p’un caso caminda un hoben tabata na suela c’un kap na curpa. Na yegada di e prome patruya berdad a bin topa c’un hende homber di edad relativamente hoben, na suela c’un kap na su curpa.
Mesora a pidi pa ambulance presenta cu maximo urgencia n’e sitio. Berdad, no a tarda mucho cu un total di unidad di ambulance a presenta p’asina brinda atencion medico n’e victima. Despues di un trabou duro, a logra baha cu e hoben herida for di e di tres piso pa e piso mas a abou. A prepar’e y sali cu ne direccion di hospital cu maximo urgencia.
Polis a cera henter e area p’asina ningun persona yega cerca di e sitio di incidente. A notifica personal di recherche y e team forensico di Cuerpo Policial, kende lo tin e tarea di investiga e caso aki. Mirando e seriedad di e caso, notifica tambe e departamento di slachtofferhulp di polis.
