Despues di a caba su HAVO na Scholengemeenschap Bonaire, Hennyson Thielman (1989), actual number un riba lista di Movementu di Pueblo Boneriano (MPB), a bin Aruba pa studia bedrijfseconomie na Universidad di Aruba. Despues di 4 aña na Aruba, el a sigui pa Amsterdam na unda cu el a cuminsa cu su Master’s den Business Administration na Vrije Universiteit. Na aña 2013, Hennyson Thielman a regresa Boneiro. El a lanta su mesun empresa di evento, pero hopi lihe politica a bati na su porta. E tabata miembro di Conseho Insular y actualmente Diputado encarga cu Asunto Economico, Finansa y Turismo.
“Cu Movementu di Pueblo Boneriano (MPB) den gobernacion di Boneiro, nos a percura pa stabilidad y tambe desaroyo,” Diputado Thielman a bisa, “Nos a logra e desaroyo aki danki na stabilidad”. Awe Hennyson Thielman, actual diputado encarga cu Asunto Economico, Finansa y Turismo na Boneiro, ta lidera e lista blauw di partido MPB. Despues di 10-10-10 gobernacion di Boneiro tabata falta di stabilidad y a conoce varios Colegio Ehecutivo (Bestuurscollege), finalmente na 2019 un coalicion encabesa pa MPB a sinta y lo termina su mandato dia 15 di maart proximo durante eleccion municipal.
Hennyson Thielman, hunto cu Elvis Tjin-Asjoe, ta un di co-fundadonan di partido MPB na 2013. “Mi intencion tabata di a yuda tra’i cortina,” Diputado Thielman a splica. “Pero hopi lihe ma ripara cu si mi tabata kier un cambio pa mi isla, trece stabilidad y bienestar pa nos hendenan, mi mester a postula mi mes y participa activamente den e proceso democratico. Di consehero, pa consehal, pa diputado y awo mi tin e honor di lidera e lista di MPB.”
“E stabilidad cu nos e brinda na gobernacion di Boneiro a resulta di ta un base fertil pa maneha e cremento cu nos isla a conoce for di 2007. Despues di pandemia, e economia di Boneiro a crece mas tanto cu e resultadonan prome cu e pandemia. Trahando proactivamente cu Gobierno Hulandes – pasobra di su mes nos lo no a logra – nos a logra un aumento di casi 40% di salario minimo, como tambe un aumento di mas cu 60% of $1047 di e pensioen di behes. Danki n’e stabilidad den gobernacion, nos tin un relacion mucho mas stabil cu Den Haag. Pakico nos a haci esaki? Pasobra nos kier un Boneiro cu ningun hende ta biba bou di e nivel di pobresa, cu tur hende tin un cas pagabel, cu e infrastructura sigur y moderno, cu nos por ofrece educacion y enseñansa pa tur adulto y cu tin un gobierno cu por garantisa bienestar di su hendenan.”
Diputado Thielman ta sigui splica cu trabou ainda no a caba: “Nos kier sigui mehora y aumenta nos capacidad pa ehecuta maneho y nos vision.” E atencion den e proximo Gobernacion, segun Thielman, ta desaroyo urbano y infrastructura, pero tambe e parti social y transporte publico. Boneiro tin un populacion hopi mixto y p’esey ta boga pa un maneho di migracion mucho mas husto y cu igualdad. “Nos kier ehecuta nos maneho di un forma mucho mas structura y unda e ciudadano ta central. E entradanan den nos prespuesto a aumenta di 47 miyon na 2019 pa 70 miyon na 2023.”
Exito di su maneho ta cu e ta kere den dialogo, cooperacion y crea sosten. “Partido MPB tabata tin 19 punto di accion na momento cu e drenta den gobernacion na 2019. Mi por bisa cu nos a sa di logra of tuma paso concreto pa logra 16 di nan.” Awo nan meta ta pa logra mayoria di e 9 asientonan den Conseho Insular (Eilandsraad) p’asina por caba di ehecuta nan plan y vision pa Boneiro.
