“Mejor Que Tu” ta un cancion den e genero Reggaeton pero hopi riba e estilo Dance Hall, unda cu e desilusion di un amor y e gana di baila, ta uni den un solo ritmo.
Algun dia pasa Hbert Riz a lansa su reciente tema atrabes di su rednan social. “Mi sa cu hopi hende por identifica cu e cancion aki, unda mas cu un despecho, ta unposicion caminda cu bo ta bisa e persona ey cu a fayabo: “Ningun hende ta indispensabel. Un hende miho cubo mi lo bay haya,” e Venezolano a conta.
E cancion a wordo produci pa e cantante, kende ademas, ta coresponde e autoria di e tema. “E cancion aki mi a grab’e mi mes na mi cas. Mi a planea pa graba den un studio pero na final mi no por a haci’e y na luga di desanima, mi a propone pa ehecuta henter e produccion y grabacion di e tema,” el a revela.
Comparti cu Padu
E cantante a conta cu den su bishitanan na e isla na 2017 y 2018, e tabata tin e oportunidad pa comparti cu e tata di cultura na Aruba, Padu del Caribe.
“Mi tata tabata tin e oportunidad di ta den dos ocasion riba e Isla Feliz, hunto cu otro compañeronan musico, a cargo di e manager Irma Linares, unda cu nos a promociona un material musical pa e momento ey. (https://24ora.com/banda-venezolano-homenahea-padu-lampe-cu-abo-den-un-version-latino/ ). Eynan nos a comparti cu famia Lampe, kendenan a ricibi nos den nan cas cu gran carisma y hospitalidad,” el a detaya.
Hebert Ruiz, kende tambe ta periodista, a sigura di a conoce Padu del Caribe, tabata un gran experiencia musical cu hamas e lo lubida y di e mesun manera, ta warda hopi aprecio e generosidad y e bon trato di parti di su amigonan Arubiano p’e.
“Mi kier pa mi musica wordo scucha na Aruba, pa nan tum’e como un regalo di mi parti, mescos cu hopi di mi amigonan riba e isla aki, a comparti cumi, e miho di nan, den e dianan cu mi a bishita e paraiso aki,” el a expresa.
“Den mi opinion, musica no solamente ta trata di competi, sino di comparti. Artisticamente ainda nan no conocemi, pero cu mi cancion, mi no ta busca principalmente pa obtene monetisacion, sino pa e hendenan disfruta di mi musica y bail’e cu emocion. E lo ta e miho ganashi,” e cantante a puntualisa.
Unda pa scuch’e
“Mejor Que Tu”, por wordo scucha atrabes di tur e rednan social di Hebert Riz, principalmente riba su canal di YouTube. Tambe riba Instagram y Facebook por hay’e como @hebertruiz y riba Twitter como @hebertruiz.
