Tabata alrededor di 3:30pm cu a bati alarma pa un caso di atraco arma, den cual a laga e victima herida atras. E caso lamentabel aki a tuma luga na e sitio si construccion na Waikiri Condominium na Noord. Varios unidad di Polis uniforma, recherche di Atraco Team y Ambulance a bay na e sitio pa brinda asistencia.
Testigonan na e sitio a conta nos cu awe ta dia di cobra, pues e hefe tabatin salario di tur hende eynan “cash”, cla pa paga. Na dado momento a scucha gritamento y a mira hendenan ma careda. Ta kere cu un total di 3 homber cu arma di candela den man, cu nan cara tapa, relativamente hoben y papiando papiamento kibra, a comete e atraco.
E trahadonan, pendiente di nan salario, a sali mesora tras di e ladronnan y por lo menos a coy e modelo di auto, Nissan March y a skirbi e number di auto, cu nan a duna Polis mesora.
Bon coordinacion di Polisnan riba caya patruyando a pone cu den un rato di ora a señala e auto cu e mesun descripcion den Catunastraat na Ponton. Asina cu a para e auto nan a sali na careda na pia, pero no a conta cu e Polisnan nan tras tambe ta den bon condicion y a gara 2 di e 3 sospechosonan.
Na e sitio a confisca e auto, a bay cu e tas den cual nan a horta e placa y otro carchinan di banco cu nan a horta tambe di e contratista. Segun un conteo preliminar, a horta 12 mil florin na efectivo, un cartera, holoshi y un celular.
Mientrastanto Ambulance na e sitio di e sucedido a atende cu e victima, cu tabata sangra hopi. Por lo menos un di e atracadonan a dal’e cu un cabo di pistool den cabes. A trat’e na e sitio mes, pendiente pa tratamento avansa na Hospital.
Recherchenan ta pidi tur persona cu por a mira algo, of sa mas di e atraco aki of por sa unda e di tres sospechoso ta scondi, pa yama tipline di Polis na 11141 pa duna informacion confidencial. Cu ayudo di comunidad, Polis por logra gara e atracadonan aki cu ta haciendo nos isla tur dia mas insigur.
