Heart-Centered Leadership Foundation, bao di su initiativa “Aruba Youth Impact!”, a organisa un actividad pa hoben durante vakantie grandi cu yama Impact Café.
Impact Café ta un rato social pa hoben, unda e meta ta pa cuminsa un conbersacion cu hobennan, caminda nan ta conta nan experiencia, ideanan y posibel solucionnan pa mehoracion riba diferente topiconan, e biaha aki e topiconan tabata educacion, salud, seguridad y participacion.
Nos hobennan tin hopi di bisa pero no ta tur biaha nan ta wordo scucha. Cu e Impact Cafés, Aruba Youth Impact! kier cuminsa enfoca riba tuma nos hobennan na serio y pa envolve nan mas den nos communidad. Nan ta nos futuro y di awor nan por cuminsa laga nan bos resona door di demostra cu nan opinion, pensamento y ideanan ta conta.
Impact Café ta wordo facilita door di un grupo di hoben cu ta yuda guia e conbersacionnan den grupo chikito. E hobennan aki a ricibi un workshop riba dynamica di grupo y tips pa uza pa promove conbersacion; por ehempel, uzo di idioma apropia, con pa motiva un hoben cu ta hopi keto pa e tambe duna su opinion, con pa yuda trece e topico di conbersacion bek central, reconoce e diferente rolnan cu un participante por tuma den un grupo, etc. E workshop a wordo duna door di Sra. Clementia Eugene.
Diasabra dia 7 di juli a tuma luga e prome Impact Café den curason di San Nicolas, sigui pa e segundo riba Diasabra 14 juli den Paradera y a culmina e proyecto di vakantie cu e ultimo Impact Café riba Diasabra 21 juli na Dr. Edward Cheung Center for Innovation. Durante e tres ora di programa, participantenan a traha den grupo di 5 pa 6 hoben, guia pa un ‘host’ y un ‘co-host’ (facilitadornan di grupo). Durante dos tanda, hobennan a comparti di cada 4 topico kico nan ta haya bon, kico nan ta haya menos bon y kico ta e solucionnan cu nan ta propone pa mehora e situacion.
E tres Impact Cafés a conta cu 43 participante en total. Participantenan tabata hobennan entre 13 aña y 21 aña di edad, di diferente bario y districto, y ta bishita diferente scol na Aruba – di EPB Hato pa Colegio Arubano. E intencion ta pa sigui cu mas Impact Cafés – participantenan a duna feedback positivo riba e proyecto, unda hopi a bisa cu nan ta agradecido cu nan por tabata tin un plataforma pa expresa nan opinion y wordo scucha.
Den luna di augustus lo presenta e resultado di e 3 Impact Cafés. Keda pendiente pa mas informacion tocante e presentacion di resultado. Bishita Aruba Youth Impact! su facebook page pa mas informacion.
Impact Café ta wordo sosteni door di Comision Nacional di SDG y Futura Lab, y ta wordo co-financia door di CEDE Aruba. Heart-Centered Leadership Foundation kier a extende un danki na Aruba Tourism Authority (ATA), Compra N.V., Sams Aruba, y Office Systems pa nan sosten den forma di sponsoring.
Heart-Centered Leadership Foundation ta celebra e aña aki 10 aña di existencia, unda a traha cu alma y curason pa ofrece hobennan di Aruba training, seminario, workshops y programanan cu enfoke riba desaroyo personal y liderazgo personal di hoben. E filosofia di Heart-Centered Leadership Foundation ta si traha di ‘paden bay pafo’, hobennan por realisa nan potencial completo. Cu Aruba Youth Impact! e fundacion kier envolve hobennan pa ta mas activo den e
cambionan cu hobennan mes kier mira den nan comunidad.
