Na Caya Safir casnan cu ta huur cu turista a yena cu awa, pero cu tin hende ta kere tin cierto cosnan cu por evita. Bisiñanan den mas cu un ocasion, prome cu nan caba cu nan cas den construccion, ta traha un canal net banda di muraya pa awa por pasa y sigui su caminda.
Tras di un di e casnan tambe tin un cas den construccion. A pidi encarecidamente na e bisiñanan pa por fabor habri un canal tambe pa e awa por sigui su caminda, pa evita situacionnan manera esun actual.
Sinembargo e bisiña a dicidi pa blokia e salida di awa. Team di 24ora.com a papia cu un di e bisiñanan cu ta preocupa. E awa aki cu ta aglomera pa motibo cu e no por sigui su destino, no ta afecta solamente su cas den construccion, pero ta afecta tambe otro casnan den vecindario. No tin nada mas bon cu biba bon cu bo bisiña, e ciudadano a comenta.
El a notifica instancianan concerni caba. El a papia cu polis, DOW y tambe Bureau City Inspector. Loke nan a bis’e ta cu e mester hiba su bisiña corte, mirando cu el a blokia e entrada di e pasada di awa.
Tin un ley cu ta bisa cu e awa mester tin un forma pa sigui ora cu awa yobe. Pero no por obliga e bisiña haci’e. Ta pa e motibo aki e cabayeroi, kende ta sumamente preocupa, tin cu hiba su bisiña corte.
Te asina leu, Bureau City Inspector a bin mira y awo DOW mester bin wak. E meneer a papia cu e bisiña cu ta bezig trahando su cas. E mester bin na un areglo cu e bisiña aki, pa wak con e por regla e problema. Pero e meneer aki no por bay den su tereno. Si mester haci algo, ta e bisiña aki mester haci’e, como cu ta su propiedad.
A papia cu e bisiña y esaki a comenta cu e mester traha un canal, otro caminda. Aparentemente e bisiña aki no ta compronde. E awa ta lanta na un skina specifico. Esey ta imposibel door di e gravedad y ta imposibel pa sak’e for di otro skina. E punta di e caminda ta na un cierto skina.
Despues cu e awa sali, e bisiña mester ubik’e na un cierto skina. P’esey tin cu papia cun’e y un otro bisiña, pa mira unda ta mas facil pa e awa por pasa.
No ta e unico victima
Tin varios cas cu ta bao di awa den e bario aki. Segun e cabayero aki, si sigui yobe, lo bay tin hopi mas awa y si no tin salida, e lo bay yena e casnan. E problema tambe ta bay ta e sangura y otro bestianan, cu ta haci e problema un tiki mas grandi.
Mensahe
Loke e cabayero ta pidi e bisiña aki ta cu e por bin cualkier dia cerca dje pa wak con nan por soluciona e problema aki. Ta un cooperacion pa traha un canal nechi. Nan mes ta sacrifica parti di nan tereno pa traha e canal cu ta sigui bay abao. Ta simplemente habri un pida pa e awa sigui su caminda. Den e caso aki, nan a busca instancianan di gobierno pa bin mira e situacion.
Si ta bon den pasado, den casonan similar, por a mira caminda cu autoridad, brandweer, DOW, tur hende a pone hende kibra muraya pa awa por sigui. Awe e awa aki a yega te ey. E tabata mas hopi. El a cuminsa chupa bay den tera. Pero, esey no ta nifica nada ya cu si dal un bon yobida, e situacion aki ta bolbe presenta.
Hasta turistanan cu ta kedando den e casnan eybanda, tambe mester a hinca auto paden pa nan por subi. Ta di spera cu bisiña coopera. Mescos cu awe ta haci fastioso pa awa cu bo no kier laga sigui pasa den bo cura bay pa caminda, mañan algo mas serio por sosode den bo cas y ta e mesun bisiña aki ta sali na bo vanguardia.
