Nos tin un situacion cu tin hende cera. Tin complicacion pa deporta hende y tur esaki ta bin cu su problemanan pa e departamento tambe.

Trudy Hassel, a splica cu tur hende sa di e situacion penoso di Venezuela. Na Aruba tin hopi sentimento pa loke ta e personanan cu ta pasando malo door di e situacion eynan.

Trudy Hassel di Guarda Nos Costa ta bai duna su declaracion……

Posted by 24ora on Monday, March 25, 2019

Naturalmente, Imigracion Aruba, tin como tarea pa proteha nos pais tambe. Consecuentemente ta traha cu leynan di LTU, entre otro, pero tambe ta wak tratadonan di Derechonan Humano pa asina cumpli cu mas tanto posibel y tambe tratado di asilo, cu ta wak minuciosamente pa por cumpli cun’e.

Loke a bin ta tende den e dianan cu ta pasa riba varios Voicenote, Hassel a comenta cu mayoria cu ta wordo bisa, no ta corecto. E ta supone cu e por a sali for di Guarda nos Costa mes, pero mayoria cu ta wordo treci padilanti no ta berdad.

Por ehempel, e asunto di luchten. Tin un sistema na Guarda nos Costa, unda cu mainta tur hende ta desayuna cu otro den sala. Nan ta haya oportunidad pa combersa, nan ta wak television y tin biaha combersamento por dura un of dos ora.

Despues di esey nan ta haya chens pa huma pafo, pa esnan cu tin mester di huma. Despues nan ta bay bek den cel. Pa 12’or tin e mesun rutina, unda cu ta saca nan afo pa nan por lunch hunto, wak television, combersa. Tambe haya oportunidad pa huma y despues bolbe bay bek den cel.

Atardi nan tin un ora di bishita y despues di esey tambe nan ta haya nan cos di come un ora. Tambe nan tin e oportunidad pa bay  huma, etc.

No ta asina, manera algun voicenote ta bisa, cu ta 45 minuut nan ta haya. Si bay conta tur e oranan pa dia, e por suma casi 6 ora, cu nan ta pafo di nan cel.

Fuera di esey, segun Hassel, e trato medico, no ta den man actualmente di Guarda nos Costa. Tin un team medico cu ta situa otro caminda. Ta tuma contacto cu nan na momento cu un persona indica cu e ta sinti su mes malo. E dokter concerni y e paramedico/verpleeger, ta esunnan cu ta bin y ta analisa e caso y ta prescribi remedi.

Guarda Nos Costa su personal, ni Trudy Hassel, ni Icho Matos, no ta ni dokter, ni verpleeger, sino ta sigui instruccionnan.

Na momento cu un persona indica cu e ta malo y dokter no por bin, ta yama ambulance y ta transporta e persona concerni pa hospital, pa chekeo medico, si acaso cu e personal di ambulance bisa cu ta necesario.

Tur esaki ta basa riba gastonan di Aruba. No ta gastonan di e persona concerni. Alabes ta importante pa sa cu na dado momento durante bishita, e espacio ta asina limita, cu nan no por tuma mucho hende. A dicidi cu ta permiti maximo dos persona pa caba bishita pa cada detenido, pa asina tur hende por haya oportunidad pa bishita nan ser keri.

Si un persona por ehempel dicidi pa bin cu 20 hende di bishita, e otro detenidonan no ta haya chens pa nan sernan keri bishita nan, pasobra no tin luga. Consecuentemente mester a tuma medidanan pa asina tur hende por ricibi nan bishita.

Asina por sigui papia riba cosnan cu ta purba di drecha y mehora pa asina cumpli cu tur sorto di regla.

Na Guarda nos Costa no tin hende na estado cu ta cera. Tabata tin hende cu a bin na estado. A duna nan meldingsplicht inmediatamente despues cu dokter indica. Tin hende cu tabata na comienso di nan embaraso. Ta evalua cu dokter y ta dokter ta esun cu ta dicidi si e persona mester bay of mester keda. Pero te cu asina leu no ta na estado cera y esey no ta e punto di salida tampoco.

Pa aclarea di biaha, Guarda Nos Costa no ta cera ningun mucha tampoco. Tabata tin voicenotenan den pasado cu nan ta cera mucho. Segun Hassel, no ta cera menornan di edad.

Solucion

Ta den un proceso cu tin cu analisa criticamente nos leynan y esey no ta den man di Guarda nos Costa, ni Imigracion. Ta conseha si, pero no ta esnan cu ta traha e leynan, ni cambia nan. Tin cu bay evalua seriamente unda ta hibando nos pais. Na un dado momento Aruba por carga e peso aki? Ta pensa cuanto persona lo por bin Aruba? Tin cu para keto riba esaki. Naturalmente ta tene cuenta cu e situacion. Pero tambe nos tin e tarea pa proteccion di nos pais. Si nos bay habri nos fronteranan pa tur hende drenta, ta kico lo bay para pa nos pais.

Ta pensa riba tur esey? Tur hende ta bon bini na Aruba, pero nan tin cu cumpli cu nos leynan. Y si nos leynan ta bisa algo, esnan cu ta eherce e ley, percura pa e leynan wordo cumpli, mester para tambe pa esey y esey ta loke ta pasando. Naturalmente derechonan humano ta importante pa nos tur. Pero na un dado momento tin limitenan tambe den tur cos den bida.

Awor aki ta purba di cumpli cu tur cos dentro di e margen cu por. Pero no ta na Imigracion Aruba of Guarda nos Costa pa tuma e siguiente pasonan. Ta depende di por ehempel e proceso den e parti di asilo di otro departamento cu mester cana su caminda pa haci esey. Ta boga tambe y ta bayendo den bon direccion, unda cu ta traha conhuntamente cu otro pa asina agilisa e proceso.

Aruba ta prepara?

Aruba a haya su mes cu un avalancha di situacion cu a gara hende riba tera, djey nan ta pidi asilo. Nos mesun hendenan a guia nan, cu ora cu yega na aeropuerto nan ta meld. Pero di un otro banda nos ta haya hendenan cu ta haci negoshi cu e situacion aki. Segun Hassel nan ta na altura di esaki y ta di lamenta. Esnan cu ta haci negoshi ta haci uzo di e momentonan dificil cu e personanan aki ta pasando aden. Cobrando nan placa cu hopi biaha nan no tin. Nan ta busca pa fia of traha pa paga, sin cu nan tin e garantia pa nan keda. Ta cosnan cu ta di lamenta. Dado momento tin cu para keto y analisa si nos leynan actual mester sigui cu nan asina.

En berdad na Hulanda e prome fase, na momento cu meld, dentro di 28 dia, bo ta keda cera. Bo no ta ni drenta habri porta bisa ban traha.

Bo ta keda cera y den e 28 dianan ey, decision ta cay si bo peticion pa asilo ta wordo otorga si of no. Si e peticion di asilo no wordo otorga, e persona ta wordo saca, despues di e 28 dianan aki.

Personanan cera

Guarda Nos Costa no ta e instancia cu tin cu tuma decision si un persona ta haya asilo si of no. Tin algun di nan a bay corte, tin algun di nan huez a dicta cu nan tin cu bay y awo consecuentemente a tuma e decision cu e instancianan cu tin cu tuma decision lihe, no despues di un aña, sino mas lihe posibel, pa asina e personanan por haya un decision riba nan status. Sea nan ta keda of sea nan tin cu bay. Ta evaluando awor aki si ta bay laga e asiladonan cu a pidi asilo den libertad, pendiente e decision di e instancia concerni naturalmente.

Kico mas por wordo haci

Guarda nos Costa tin un trabao y su trabao ta no pa cuida hende y duna nan cuminda. E tey pa subi caya y combati ilegalidad, hendenan indocumenta riba caya y por ta un peliger pa nos pais. Hende tin cu compronde cu si tur hende kier sigui gosa di e Aruba cu nos tur a lanta fo’i dje, e situacion aki no por sigui. Dado momento nos lo bay ta sobrepopula, cu no tin trabao pa ningun hende mas. Ya caba tin pais cu hendenan a cuminsa mendiga riba caya, pasobra nan no por haya trabao. Y esey ta e direccion cu nos kier pa Aruba bay? Por ta nos mesun localnan no ta hayando trabao. Unda nos kier bay? Ta un pregunta hopi esencial pa nos tur. Guarda Nos Costa y Migracion Aruba ta haci nan trabao conforme cu ley y lo keda haci esaki tambe. Nan ta depende di otronan pa por bay wak kico ta sosode awo.

Situacion na Corsou

Na Corsou, boto a drenta y polis a bisa nan pa nan bay meld y laga nan cana riba caya. Segun Hassel, e maneho na Aruba no a cambia. LTU ta keda wordo eherce. Guarda Nos Costa tambe ta keda haci su trabao. Naturalmente minister di Husticia ta preocupa y e tin razon di ta preocupa. Guarda nos Costa ta sigui cumpli cu su tarea y ta pa percura pa nos leynan wordo respeta. Naturalmente e situacion aki ta uno cu por a premira si cu e lo bin, pero no a sper’e ainda di e embergadura aki. Si no haci algo e ta bay bira pio

Comments

comments