Grupo di Venezolano preocupa pa salud di nan amigo cera na GNC

Siman pasa tabata tin un grupo di Venezolano indocumenta cu tabata deteni na Guarda nos Costa (GNC) y cu a drenta den welga di hamber pa motibo di supuesto maltrato cu ta tuma luga eynan.

ADV

Despues, a laga e grupo den libertad, cu e condicion cu nan mester meld tur dia na GNC, te ora cu yega momento cu nan tin cu bandona e pais.

Ilegalnan deteni ta expresa nan mes riba experiencia cu trato haya na Aruba

Posted by 24ora on Sunday, March 31, 2019

Awe nan tabata na e edificio di Cruz Cora, pa asina boga pa e salud di un di nan compatriotanan cu ta malo cera na GNC y no ta hayando e atencion debido.

Ta trata di Orangel Torres. E tin problema di taquicardia posiblemente y cu casi ta sufri di un atake di curason. E tin mas of menos dos luna y mey cera na e edificio di GNC na Dakota den condicionnan di aislamento casi absoluto. Primordialmente e grupo a bin boga p’e.

Nan mes no sa dicon nan amigo no a logra haya e derecho aki. Torres ta un di esnan mas afecta, encuanto su detencion. Nan ta na altura di e ceramento di frontera y casi imposibel cu nan tin’e cera pa dos of tres luna, sin dun’e un fecha, ni sikiera di ki ora e ta haya su libertad.

Si e fronteranan ta cera te December 2020, nan lo bay tene aresta te e tempo ey? E grupo ta puntra. Nan ta observa cu preocupacion loke ta pasando na Dakota.

Asilo Politico

E grupo a comenta cu nan tin un solicitud di asilo politico. Den hopi caso nan no a haya ningun contesta. Un di e personanan aki, el a bay aeropuerto y el a entrevista cu un persona di imigracion y a yega un formulario unda cu e ta indica pakico e ta pidi pa un asilo politico.

Segun e persona, su experiencia tabata uno traumatico.

Sin embargo Trudy Hassel di Guarda nos Costa a comenta cu nan ta haya cuminda tres biaha pa dia y cu nan ta ricibi bon trato.

Segun e grupo, cu ora cu Hassel papia cu nan tin bon trato, nan no sa di kico e ta papiando. Den nan experiencia, cu no ta asina.

Trato incorecto

E grupo tabata cera pa 20 ora diario na Dakota, den un cel di 3×2 sin wak luz di dia. E instalacionnan no ta esunnan optimo. Tampoco nan no tabata permiti nan haci yamada di telefon. Den e miho di casonan, nan tabata permiti pa tin 2 minuut di yamada.

Repuesta

Un otro persona di e grupo a comenta cu nan a bis’e pa bay entrevista. Ta ridiculo con nan ta otorgando e asilonan, door di yena un cuestionario na un manera poco formal cu nan ta entreg’e y ricibi e contesta, cual ta un “no” bon grandi y na Hulandes.

Awo nan tin te cu diamars pa nan sali for di e isla.

Frontera ta cera

Tur hende sa cu e fronteranan pa Venezuela ta cera. E unico manera ta a apela e decision di asilo y purba pa e cosnan tuma un otro ritmo. Pasobra realmente tur hende eynan tin mester di e asilo aki. A papia di un comision cu a bin di Hulanda y te ainda nan no a mira e comision aki. Aki ta djis pidi pa un asilo, y yena un formulario y despues di 24 ora, ta haya un contesta. A pensa cu nan ta evalua emocionnan y haya sa palbablemente di e persona cu ta papiando, pero via un cuestionario no por haya sa, cual ta e manera corecto pa duna un asilo. En realidad, loke e grupo ta pidiendo pa baha e persecusion, e libertad di Orangel Torres. Nan ta sinti nan mes persigui realmente. Otro cos ta e situacion di presenta tur dia. Kico ta nan delito. Nan ta practicamente indocumenta, pero nan tin nan paspoort wanta y ta documentonan cu ta intransferibel. Den paisnan Africano of gobiernonan dictatorial so ta wanta paspoort. Nan ta sin documento y coriendo e riesgo. E papel cu Cruz Cora a entrega nan, segun nan bal, pero ora cu nan detene nan, ta bay cu nan toch.

Ta hopi cos cu nan a bisa nan na Dakota. E grupo no kier papia malo di e funcionarionan cu ta traha na Dakota. Tin algun cu no ta sirbi. Tin cu ta hopi valioso eynan, cual nan ta pensa cu nan mester dirigi Guarda nos Costa.

E grupo tambe, pa no laga esaki paga, a busca apoyo pa ta un contraparti pa e Gobierno y nan, pa e forma asina desastroso a maneha e situacion aki, di e migrantenan Venezolano. Ta papia aki tambe di Xenofobia contra e Venezolanonan.

Comments

comments