Aña pasa, 27 di november 2018, DOW a manda un carta di invitacion na varios companianan aki na Aruba pa un “onderhandse aanbesteding”, destaho bou man of destaho riba invitacion, pa entrega di un incinerator pa deshaci cu e.o. di “sludge”, cadaver y “medical waste”.
Ora nos bisa cu esaki ta hole stinki, no ta wordo referi aki na e “sludge” of cadaver, sino na henter e proceso cu a tuma lugar.
Cu for di principio henter e asunto aki tabata hole stinki ta wordo demonstra dor di e hecho cu un proyecto di e embergadura aki, ta exigi di e companianan aki pa entrega nan oferta dentro den 15 dia, anto pa un proyecto cu ta costa mas di 15 miyon florin. E ultimo dia pa entrega e oferta tabata 12 di december 2018 pa 11 or di mainta. Nos a compronde cu casi tur compania cu a haya invitacion, a manda un carta di protesta pa cu esaki. E unico cu no a protesta ta e compania miembro di e Cartel. Straño noh?
Algo cu ta hopi straño tambe ta e hecho cu manera e proyecto a wordo presenta, lo ta trata di un proyecto di por lo menos 15 miyon florin. Y e “ingenieronan” di DOW sa esey y toch ta scohe pa complace cu e minister pa bai un destaho bou man enbez un DESTAHO PUBLICO, manera cu den un gobernacion drechi y integro ta suppose di sosode.
Berguenza ta pa tende y lesa cu e director di DOW ta declara cu tabata tin un destaho publico. E director ta simpelmente GAÑA! Pakico? E tambe ta parti di e corupcion administrativo? Of e tin miedo pa haya un bon grita y zundra atrobe di Otmar? Unda CAD a keda? Un inversion asina grandi no mester bai un “DESTAHO PUBLICO”? Conforme reglanan di OECD inversionnan riba 6 miyon dolar no mester bai internacional tambe? Ta miedo CAD tin of nan tambe ta sigui instruccion di ariba? Tempo di e proyecto pa solucion di desperdicio bou mi periodo, si CAD a haci su comentarionan relaciona cu proyectonan grandi asina. Mirando cu ta trata aki di reglanan di OECD, ministerio di Finanzas y Economia, y Departamento Economico a wordo envolvi den esaki?
E protagonistanan den henter e manipulacion entorno e incinerator pa deshaci di e “sludge”, cadaver y “medical-waste” ta haci comosifuera cu e otro compania, por cierto un compania 100% Arubano, cu a participa den e “fixed-bidding” aki, lo a ofrece e aparato cu ta den uso awor, loke absolutamente no ta corecto. Aki tur 3 ta GAÑA!
Hecho ta cu e compania aki a ofrece un incinerator cu ta cumpli cu cada un di e rekisitonan tecnico y administrativo cu DOW a exigi den e bestek DOW no.30 dj 2018.
Aparte mester remarca cu e compania aki tin amplio experencia no na Aruba so pero afo di Aruba tambe. Recientemente bow di un procedura completamente habrí y transparente y scrutina pa instancianan hulandes, e compania aki a instala un incinerator na Saba.
Apesar di esaki, minister kier insinua cu e compania aki lo no ta cumpli cu e rekisitonan.
Dicon e 3 protagonistanan a recuri GAÑAMENTO y bisa cu loke cu ta ser hasi actualmente riba dump no ta cumpli cu e normanan, cu DOW mes ta aplica? Den DOW no tin hurista pa adverti tanto e director como Otmar cu tin chens cu e pueblo lo por bai paga un daño di perhuicio? Of e director a wordo adverti pero ela scohe pa bai di acuerdo cu e corupcion administrativo aki?
Tambe nos ta puntra si acaso DWJZ a wordo acerca pa duna su consehonan necesario, mescos tambe Direccion di Finanzas?
Dia 3 di december 2018 tabata tin un “inlichtingen vergadering” y remarcabel ta cu e gran ausente tabata e miembro di e Cartel. Esaki pasobra ya caba tabata palabra cu ta e lo haya e contracto multi-miyonario aki? Esaki mirando cu ya caba e dichoso aki tin varios contractonan miyonario SIN destaho publico. Of aki tambe ta un “FIXED- BIDDING-PROCEDURE” tin, na unda ta e compania miembro di e Cartel MESTER haya un otro contracto miyonario.
Dia 12 di december 2018 na DOW e envelopenan wordo habri. Ta solamente 2 compania a yega te eynan. Aki e miembro di e Cartel a bid casi 1 miyon florin MAS cu e otro compania. Con por ta cu den un “onderhandse aanbesteding” ta duna e “highest bidder ” e contracto aki toch?
Y director di DOW doodleuk ta declara cu e SPONSOR a gana e bid? Mihor bisa, nan a regale un otro contracto multi-miyonario. Aki atrobe e director ta GAÑA! Declaracionnan asina ta un “directeur zeer onwaardig”, sigur mirando cu e sa masha bon bon cu e compania cu ta traha actualmente na Parkietenbos ta cumpli cu TUR e rekisitonan cu DOW mes a stipula den e bestek.
Remarcabel ta cu e envelopenan a wordo habri for di 12 december 2018 y ta te siman pasa e 3 protagonistanan diripente ta bin cu e anuncio manipulativo aki cu a firma un Letter of Intent. Y esaki a sosode despues cu e compania cu ta laborando actual na Parkietenbos, por cierto na satisfaccion di DOW y Serlimar SG ,a dirigi un carta na e minister cuestionando e forma di no drechi y no integro cu e ta hibando desde cu ela asumi e responsabilidad aki.
Un biaha mas nos ta constata cu Otmar ta sigui cu su maneho di complace cu su sponsornan poniendo TUR reglanan di Good Governance un banda. Y lamentablemente cu colaboracion di su directornan “handpicked” cu e por dirigi manera un harlekin di un “poppenkast”!
Mayan UPP lo entrega un peticion pa haya TUR documentonan entorno e “onderhandse aanbesteding” aki pa asina ey prepara un denuncia cu nos lo entrega na Ministerio Publico pa haci un investigacion riba tur esnan cu ta presta nan mes pa haci tipo di corupcion administrativo!! Nos ta obliga di hasi esaki pasobra nos a ripara cu NI un parlamentario ta sacando un dede pa purba di para e PORkerianan aki.
