Pashentnan di dialisis na Instituto Medico San Nicolas (IMSAN) tabata kier a expresa nan disgusto pa e decision tuma door di AZV pa para gran mayoria di e transporte di pashentnan di dialisis.
Vocero di e grupo, Julieta, a bisa cu e pashentnan a firma un carta den cual nan a manifesta preocupacion y malcontento con AZV riba instruccion di Gobierno di Aruba y Hulanda pa baha gasto a para transporte di e pashentnan aki. “Si berdad Gobierno tin e ser humano central, mester exigi di tur instancia y persona na Aruba pa aplica esaki na tur momento. No por ta posibel cu riba diabierna, 12 di juni, 2020, ta notifica e pashent di dialisis cu entrante dialuna no tin e servicio mas di transporte y cu e pashent mester wak con e ta yega y bay bek su cas.
“E noticia aki pa nos cu ta dialisa tabata un shock. El a trece cu ne hopi tristesa y insiguridad, pero tambe miedo y rabia. Pakico nos. Tabatin hopi yoramento y zundramento pasobra nos a sinti nos mes defrauda y bandona. Pashentnan di dialisis ta hopi vulnerabel. Nos den tempo di crisis mester a sali 2 pa 3 biaha pa siman pa tuma nos tratamento cu ta wanta nos na bida. Nos sa cu si nos a keda infecta cu e virus aki dificilmente nos por a scapa di dje. Danki na nos transporte fiho cu si a sigui e reglanan di DVG cu awe nos por bisa cu ningun di nos a keda contagia. Pa esaki ta felicita Gobierno. P’esey no por compronde cu awo cu a habri frontera, e mesun Gobierno aki hunto cu DVG cu a keda enfatisa riba e normal nobo, ta cla pa expone nos na un transporte cu no ta bay ta “safe”.”
Ta puntra nan mes si e idea ta pa deshaci di nan cu ta un gasto pa Gobierno di Aruba. Mester bisa cu e vocero tabata sinti su mes hopi emocional na momento di lesa e carta di dje y su compañeronan den e grupo di dialisis. A mustra cu despues di e tratamento, nan no ta keda 100% y sigur no por transporta nan di cualkier forma. Asina por ehempel esnan di Lite Life Medicab ta entrena pa atende cu e pashentnan si nan bira malo na caminda. Subi bus, depende di bisiña of famia ta dificil pa un pashent di dialisis
Banda di esaki, nan ta haya nan mes cu gasto extra di eigen bijdrage pa ora di bishita dokter of busca recept na Botica. Un total di 63 persona cu ta bay wordo perhudica a firma e carta cu ta bay entrega na Gobierno.
