Entrada nan di grondbelasting tambe ta un punto di atencion cu CAft a papia riba dje, den su reaccion riba e uitvoeringsrapportage. Nos lo mester bay un tiki mas severo of un tiki mas intensivo cu e trabao nan di cobransa di grondbelasting, pa por incasseer y meet target. Motorrijtuigbelasting a papia riba dje y minister di Finansas a menciona cu tin un non-compliance di 24%. Pa plachinan A, tin mas of menos 17 mil plachi di number cu no a paga nada, ni prome cuartal, ni di dos cuartal, ni di tres, ni di cuater cuartal, no tin nada paga riba nan. Awo atrobe esaki ta compliance y ta responsabilidad di e cliente cu lo mester atende tambe cu su debernan fiscal.
Tin cu atende di un manera hopi eficiente cu esaki, cual ta recomendacion di CAft. Y ta bay haci esaki tambe, segun Gomez-Pieters. Ta algo cu tin cu haci como departamento, pa por trece tambe un tiki mas seriedad den e asunto ora entradanan ta keda atras. Tur hende ta mira e departamento di impuesto, tur hende ta mira cu aparentemente tin cu traha mas duro, of no ta trahando duro suficiente, pero compliance ta keda responsabilidad di e cliente. Ora cu e cliente no cumpli, naturalmente e tin opcionnan den ley caminda cu por pone un cobransa y un boet. Den e caso di winstbelasting, esey ta e caso y den e caso di impuesto di vehiculo di motor, tambe ta e caso.
Con e proceso ta cana den practica
E proceso, segun Gomez-Pieters, ta segun cu haya e uitvoeringsrapportage for di e oficina di ministerio di finansas, CAft por haci pregunta y lo coordina esaki segun cada departamento pa asina por aclarea cualkier preocupacion cu nan tin, of preguntanan tambe cu nan tin. Siguientemente nan ta bay nota nan reaccion, cu e informacion cu nan a ricibi.
E tarea di Departamento di Impuesto ta, pa percura cada vez pa meet target. Mester traha duro pa por yega. Naturalmente tin cosnan cu por pasa na caminda. Si bo ta traha un begroting y ta proyecta un crecemento economico cu no ta realisa su mes den e aña, ta cosnan cu despues por splica dicon no a yega.
Pero semper e meta ta cu ta bay p’e tur aña, haciendo nan best pa por yega tambe na un aparato mas eficiente y eficaz, segun, sra. Luenne Gomez-Pieters.
