Desde 3’or di marduga Cuerpo di Bombero di Aruba a ricibi un melding cu Bubali Plas ta na candela y di biaha a mobilisa unidad pa bay mira e situacion. Desde trempan tabata bringa e candela pero algun factor a hunga un rol manera biento y algun area ta seco. E candela a cana lihe di Sasaki bin abou unda a gara e parti seco.
A logra paga e candela cu excepcion un pida candela cu bomberonan no por yega na dje via Sasakiweg door di e caminda. Cuerpo di Bombero di Aruba tabata wardando riba un excavator di DOW, pa asina traha un caminda pa por yega na e candela.
Cuerpo di Bombero di Aruba ta mira dos motibo di e candela y esaki ta bin door di e orario. Comandante de Cuba a splica cu e por ta accidental door di un hende por a tira sigaria for di su auto. E otro factor ta intencional, pasobra hendenan sa cu Bubali Plas tin hopi secura. Hopi biaha pa pret, pasobra tin hende kier mira algo kima. E candela a cana den un forma straño y no tabata facil pa yega na dje di cual a kima hopi naturalesa. Despues di tur trabou haci pa paga e candela lo haya sa kico ta e dañonan den Bubali Plas.
A staciona bomberonan na Sasakiweg, na e mirado. Tabata warda riba DOW pa asina hunto por a traha un atake, unda e prome atake tabata banda di Sasaki pero no a conta cu e secura mas paden. E daño ta na e plas, asina Comandante a bisa.
Mientras cu tabatin hopi huma, hendenan tabata traha riba un construccion. Segun Comandante, no por a prohibi nan di traha aunke a informa nan. E huma no tabatin e mesun efecto cu manera un cas of auto kima, pero ta algo dañino. E persona a scoge pa sigui cu nan trabou, pero a percura pa avisa nan.
Greg Peterson di Bird life, tambe tabata presente desde oranan di marduga y a bisa cu tin hopi secura, pasobra awa no a cay. A ricibi ayudo di Cuerpo di Bombero di Arub y departamento di gobierno, unda cu DOW a bay traha un canal pa haci posibel p’e candela sigui su caminda. No tabata nada facil pa haci e trabou.
Un di e problemanan ta cu a cuminsa e temporada di broei di cierto parha. Tambe esaki ta e temporada di inmigracion di parhanan cu ta bin di Merca y esaki tin su impacto. Peterson ta keda positivo pasobra e temporada di horcan a cuminsa y ta spera di un tiki yobida. Asina aki por recupera den algun luna y un biaha mas por tin Bubali Plas manera e tabata. Ta spera cu gobierno por tin un plan pa futuro ora tin candela y por atende esaki un tiki mas miho. A mira turtuga kima, hasta pisca, parha y babynan di parha cu no por a sali. Tur departamento concerni a monitoria e situacion di e candela.
