Na 2010 a apunta Grace Maduro como presidente di Directiva di Conseho di Administracion di Tribunal Comun di Husticia di Aruba, Corsou, St. Maarten y Islanan BES (Beheerraad). Despues di fungi durante e prome 5 aña Grace Maduro como presidente di e conseho aki, a acepta pa keda 5 aña adicional como miembro y awor a yega e ora pa e retira di e conseho.
A pesar cu Grace Maduro no ta abogado ni hurista, e ta un lider y un profesional cu experiencia amplio den reorganisacion y maneho den diferente sector manera Project bureau Status Aparte (1983-1986), Project Bureau Organisatie & Efficiency pa Land Aruba (1986-1989), Hefe di Personal na Dr. Horacio OduberHospitaal (1989-2008), Senior Manager na KPMG Aruba-Advisory (2008-2010) na unda el a fungi como Kwartiermaker pa Ministerio pa Salud, Medio Ambiente y Naturalesa pa Pais Corsou, Director y co-doño di Fantastic Gardens Aruba (2010-presente).
A forma e Beheerraad na momento cu a bin cu e Ley di Reino (Rijkswet) y Aruba a forma parti di e Corte Comun di Husticia (Corte) desde 10 di october, 2010. Beheerraad bon mira, tin dos tarea primordialmente. Na prome luga, e ta supervisa e maneho operacional di e Corte pa e paisnan. Entre otro esaki ta encera supervisa e implementacion di e plan anual y e ciclo di planificacion & control incluso presupuesto, y e Directiva ta adapta e cuentanan anual di Corte. Ademas di esaki tin consultanan regularmente cu e Ehecutivonan di e Corte–riba maneho operacional di asuntonan manera continua y amplia e implementacion di sistemanan nobo di IT, maneho di personal, financiero, mantencion y reparacion di edificionan y infrastructura a largo plaso. Un regla fundamental den funcionamento di Corte ta cu riba 1 di april e cuenta anual di e aña anterior mester ta riba mesa di nos Ministernan. Un regla cu Beheerraad ta cumpli cabalmente cu ne. Esaki ta trece un planificacion y control hopi estricto.
Su experiencia ta amplio, tambe den organisacionnan cu a duna e habilidadnan necesario pa por funciona optimalmente den un rol di “Toezichthouder” cu hopi exito. Grace Maduro den su trayectorio tabata Miembro di Directiva di entre otro: Stichting Arubaanse Muziekschool, Stichting WitGeleKruis Aruba, Stichting Combin A (Basisschool de Schakel) Y Stichting Aruba Insight Seminars. Claro no tur pareu pero si e trabou di un toezichthouder ta algo cu e semper a haya masha interesante.
“Tur e experencianan aki a yuda mi den e tarea di ta un “trahado di brug”, conectando y fortificando e lasonan profesional entre e diferente islanan y ta algo cu a enrikece mi experiencia masha hopi mes. E proceso no tabata facil pasobra ora Antias a bay for di otro, St. Maarten y Corsou a haya nan status aparte. Boneiro, St. Eustatius y Saba a bira Caribisch Nederland, cu un status di gemeente. Nos a cuminsa traha basa riba e leynan nobo y mester a cuminsa traha na un manera nobo y completamente diferente. E isla mas grandi Corsou cu tabata custuma di traha na un manera, mester a ahusta y custuma cu un manera nobo cu e participacion igual di un y tur”, asina Maduro ta conta.
Grace Maduro a sigui splica como presidente di Beheerraad el a hay’e ta schors reunion varios biaha pa asina tur participante reflexiona y trece un ambiente di tuma di decision na unda tur partnernan den e conseho por a participa riba un base di igualdad. Pues un dinamica completamente diferente di loke nos tabata custuma cu ne. Durante e periodo aki hopi aspecto a cambia y nos a siña tene cuenta cu e participacion di un y tur en bes di tuma di decision unilateral. Tabata diferente pero un otro acercamento cu a trece solucionnan nobo pa cualkier impasse entre e miembronan di Beheerraad. Y na final nos a logra crea un ambiente di trabou cu un participacion profesional y igual di cada miembro. “Asina nos a logra surpasa e structura di desigualdad entre e diferente partnernan di Antias (structura bieu) y awendia nos ta traha riba un base di respet mutuo na unda e interes di Corte riba cada isla ta prevalece. Esey no kiermen cu cosnan ta bay facil” Maduro a expresa.
Grace Maduro: “Un danki special ta bay pa Marja van Kuijk, e “kwartiermaker” cu despues a representa e islanan BES den e prome Beheerraad. Van Kuijk a hunga un rol importante den realisacion di e proceso di cambio aki. Danki na su esfuerso y colaboracion a trece un balans tambe den e constelacion di hende homber y hende muhe den Beheerraad. E prome añanan cu Liesbeth Hoefdraad como Presidente di Corte tambe tabata un experiencia hopi bunita. Hoefdraad tabata un ‘tiger’ cu tabata defende su neishi cu yama Corte. Algo cu mi semper a aprecia di dje. E tabata defende Corte y traha na e desaroyo di Corte tabata su tarea primordial. Y den esaki a comunicacion cu mi persona como presidente di Beheerraad tabata hopi estrecho.”
Na 2019 na momento cu Covid-19 a cuminsa afecta nos, a cuminsa cu e reunionnan online. Unda antes e reunionnan tabata tuma luga na e diferente islanan, awor ta tuma luga riba un plataforma digital aunke cu esaki no ta mescos un reunion den persona. “Loke cu a sobresali como un factor importante den e experiencia unico aki trahando cu otro ta cu nos cada un ta bin di diferente custumber y cultura. Den e literatura Antiano esaki ta wordo yama e “Gespleten Persoonlijkheid” Personalidad Dividi. Despues cu e Antiano/Arubano traha y studia na Hulanda y regresa nos islanan, nos ta sinti hopi biaha cu nos no ta pas mas debi cu nos a cambia y a adapta na e pais di nos estudio. Personalmente mi tabata hopi consciente di e fenomeno aki pero sigur mi experiencia den hospital di Aruba na unda mester a traha profesionalmente c’un y tur a yuda mi pa no keda pega den e proceso aki. Mes facil cu mi ta delibera y discuti cu mi colega di BES, mes facil mi ta haci esaki den papiamento cu mi dos otro coleganan di Corsou y St. Maarten. Nos no ta carece di nada pata un ‘Koninkrijksmens’. Es mas,danki Dios cu nos ta comprende nan miho cu nan ta comprende nos. “Nos mester siña para den un zona di neutralidad y haya nos propio luga den nos ambiente di Reino.”
Den esaki respet pa otro y atencion pa cada situacion di e paisnan ta un factor hopi importante den logra e cooperacion cu nos mester. Al final como miembro di Un Reino nos tin hopi di ta orguyoso di dje. Nos ta papia y comprende mas cu un idioma. Nos ta profesional y nos tin atencion pa e situacion di cada comunidad riba su mes. Den Corte e Rubiano ta wordo yama “mondig”. Na mi parce nos ta ‘asertivo’ y esaki ta un aspecto fuerte den nos forma di anda cu otro. Como colega nos ta defende tur isla.
Un punto debil den e atencion pa islanan BES ta keda e asunto cu despues di 10 aña ainda e “huisvesting’ di Statia no ta cla. Boskalis por saca un mamut tanker for di Suez Canal pero no por logra trece 4 muraya di beton pa un edificio apropia pa St. Eustatius. Hopireglanan di licitacion Europeo, burocracia y falta di conocemento di e situacion local ta impedi esaki. Riba un isla chikito esaki por ta un problema cu bo mester por resolve den un forma pragmatico. Den 10 aña mi a experiencia un falta di comprondemento di e proceso aki door di esunnan responsabel. Y mescos nos ta habri pa critica nos mester por duna nos critica como Beheerraad pa yuda drecha e situacion aki. Nos por ta satisfecho cu e esfuerso di Aruba, Corsou y St. Maarten pa cumpli cu e responsabilidad pa edificionan di Corte riba cada un di e islanan. Den tempo di Covid-19 ainda mas dificil pero e tin e atencion necesario.
“Mi ta considera e trabou aki como uno cu, a pesar di hopi desafio, mi a haci cu placer y determinacion pasobra importante tabata y ta keda pa nos demostra nos mes cu nos(tabata) por e trabou na beneficio di tur e miembronan di Beheerraad den Reino. Na final nos tur ta profesional y nos por. Mi a traha bon cu tur 2 ministernan di Aruba di Husticia desde 2010. E Rijkswet (Ley di Reino) ta e weso di lomba di e funcionamento di Corte y parti di nos exito. Esaki ta un prueba mas cu nos mester sigui desaroya profesionalmente y traha hunto a base di respet mutuo.
Maduro ta sigui splica cu despues di 10 aña e por mira atras na un temporada na unda, cu respet, profesionalismo y comprondemento entre tur 4 miembro di Beheerraad ta prevalece. A logra pa traha hunto manera partner individual y igual den Reino Hulandes. Beheerraad lo keda traha pa sigui profesionalisa e organisacion, cu un enfoke continuo pa mehoracion di servicio na su clientenan. Automatisacion mester sigui pa asina duna un bista mas cla riba e progreso di e casonan, y na unda por gana eficiencia den maneho di e casonan.
E ta satisfecho pero contento cu e por sigui aporta den Reino por medio di LeerorkestAruba cu otro islanan. “Y mi a siña den e periodo aki cu nos mester traha hopi mas eficaz y cu tur nos pasion na proteccion di nos muchanan. Mi ta spera cu mi por sigui aporta na e implementacion di e Codigo di Proteccion di Mucha y Hoben y yuda nos profesionalnan pa bin cu e cambio necesario pasobra cada mucha abusa ta uno di mas”, asina Grace Maduro a finalisa bisando.
