Manera ta kustumber e kolegio di supervishon finansiero mediante un karta a duna su konseho riba e presupuesto 2018 di e Entidat Públiko di Boneiru. E presupuesto mester ta balansá, legítimo, efikas. E atministrashon finansiero mester ta kontrolabel i e kompromisonan finansiero den e presupuesto no mester forma un rísiko inaseptabel pa e añanan di presupuesto benidero.
E kolegio di supervishon finansiero ta raportá sinembargo ku gobièrnu a kòrta ku 16.6% den supsidio pa diferente instansia i organisashonnan na Boneiru. Alarmá pa esaki MPB komo un partido responsabel a tuma kontakto ku diferente instansia aki na Boneiru pa puntra kiko eksaktamente ta pasando. Loke MPB a tende ta ku gobièrnu no ta tuma kontakto ku ningun instansia òf organisashon, pero den nan afan desesperá pa krea espasio pa posiblemente por hasi nombramentunan polítiko, a disidí di kòrta sin tene kuenta ku e interes general di e pueblo di Boneiru. Personanan i instansianan ta man na kabes i kasi na yoramentu hasiendo e pregunta ta kon nan mester hasi den 2018 pa kumpli ku nan obligashon nan. Esaki ta un akto iresponsabel di e gobièrnu aki.
Tuma por ehèmpel nos ofisina di turismo. Gobièrnu a kòrta den nan presupuesto ku 400.000 dòler. Sèn ku e ofisina mester pa promové Boneiru den eksterior pa asina atraé mas turismo pa Boneiru i drecha e ekonomia di Boneiru. Al kontrario: e ofisina di turismo mester di mas medio finansiero pa hasi su trabou manera debe ser. Esaki por ta un sla pa hotèlnan, restorantnan, nos aeropuerto i nos taksistanan. Parse e gobièrnu di simia no kier laga nada mas krese na Boneiru.
Otro instansia ku a kòrta den nan supsidio ta fundashon kas Boneriano. Ta stroba e fundashon strukturalmente pa traha 500 kas pa pueblo i pa koroná obra ta baha hacha den nan supsidio. Esaki lo tin konsekuensianan grandi i desastroso pa hopi famia marginal na Boneiru. Loke gobièrnu kita di supsidio ta e famia ku ya tin problema finansiero mester kubri. Retrasonan den pago lo bai subi drástikamente ku tur e dolónan ku esaki ta trese pa e famia.
E gobièrnu di simia i speransa ta resultá den un gobièrnu iresponsabel i hasta a-soshal ku lo mata tur speransa di e pueblo Boneriano si mira kon a korta den presupuesto di diferente organisashon. Aya banda si ta den tapara pa bai nombra kompinchinan ku salario gordo i di otro banda pueblo ta sklama ku su situashon soshal. MPB ta protesta enérgikamente kontra e maneho deskabeyá i a-soshal di e gobièrnu aki. Nos lo hasi nos máksimo esfuerso pa kambia e rumbo ku e gobièrnu aki ta bayendo kometiendo inhustisia un tras di otro kontra e pueblo di Boneiru.
