E biahe di e delegashon di Gobièrnu di Kòrsou pa Hulanda pa un konsulta gubernamental, no ta sigui mas. Motibu pa esaki ta ku pa Gobièrnu di Kòrsou e intenshon tabata, manera palabrá ku Hulanda, pa yega na un akuerdo entre e gobièrnunan tokante ehekushon di e vishon di Kòrsou su Strategia di Kresementu. E akuerdo ta inkluí pasonan pa yega na un presupuesto balansá i kompensashon di défisitnan den un temporada realístiko di 5 aña. Punto di salida di Kòrsou den e palabrashonnan tabata ku a base di e akuerdo, un ‘aanwijzing’ komo tal lo no ta nesesario.
Sin embargo, otro siman djabièrnè e proposishon di duna Korsou un ‘aanwijzing’ manera e instituto CFT a proponé, ta riba agènda di Konseho di Minister di Reino. Tin indikashonnan fuerte, ounke no definitivo, ku den e reunion di Konseho di Minister di Reino esei lo resultá den un ‘aanwijzing’, sin konsiderá loke Hulanda ya kaba tabatin komo palabrashon ku Gobièrnu di Kòrsou pa yega na un akuerdo di kresementu.
Ta trata aki simpelmente di prinsipio. Gobièrnu a konstatá ku e konsepto di e ‘aanwijzing’ – na su apareser – no ta tene kuenta ku tur aspekto ku ta hunga un ròl importante den e totalidat di e situashon finansiero prekario ku Kòrsou ta aden. E ta menshoná ku Kòrsou mester yega na un presupuesto sin défisit e aña aki i mester kompensá e défisitnan di añanan anterior den e próksimo 3 añanan, enbes di 5 aña manera Kòrsou a proponé. Tambe e konsepto ta menshoná pa atendé ku debenan na APC i SVB, ku por sierto den kaso di APC, Kòrsou ya kaba a kumpli ku esaki a base di un akuerdo.
Konsekuentemente, e ‘aanwijzing’ ta enserá instrukshonnan ku ta irealístiko i ku mas bien lo stroba desaroyo di nos pais en bes di stimulé. Mirando ku Hulanda ke sigui ku un ‘aanwijzing’ irealístiko enbes di un kolaborashon boluntario pa kresementu duradero, pa Kòrsou e biahe no tin sentido mas.
Pa Gobièrnu Rhuggenaath e posishon di Hulanda ta algu di lamentá, pero esaki no ta algu ku no a tene kuenta kuné. Gobièrnu a tene kuenta ku tur senario. Strategia di Kresementu ta keda e kompas ku Gobièrnu a proponé i ta bai usa pa logra e meta di mehorá e situashon finansiero i organisatorio di nos pais. Manera Promé Minister Eugene Rhuggenaath a bisa diferente biaha kaba, e Strategia di Kresementu pa Kòrsou ta sigui ku òf sin ‘aanwijzing’ di Hulanda. Kòrsou ta asumí su responsabilidat i ta hasi tur esfuerso pa drecha nos ekonomia, hasi e ahustenan nesesario i fortifiká e aparato públiko, kombiná ku un maneho finansiero responsabel i realístiko i un agènda sosial humano.
Kòrsou mester di espasio fuera di normanan di ‘Rijkswet’ (Rft) pa por atendé ku nesesidatnan sosial, ahustenan pa ekonomia por krese, i mehorashon di efisiensia di nos aparato gubernamental. Mirando esaki, Kòrsou ta spera ainda ku Konseho di Minister di Reino por tuma un desishon mas realístiko pa loke ta trata un posibel ʹaanwijzingʹ. Den pasado Hulanda ya a duna di konosé ku el lo duna sosten atraves di e akuerdo di kolaborashon ku a firma na yanüari 2019. Pa e motibu akí Gobièrnu di Kòrsou ta keda optimista i tene porta habrí pa un koperashon sano i positivo entre a paisnan den Reino, basá riba un vishon komun.
Gobièrnu di Kòrsou ta konta riba tur partner stratégiko i riba komunidat di Kòrsou kompleto, pa huntu traha riba futuro di nos pais, pone nanishi den e mésun direkshon i mustra ku Kòrsou por yega na mehoransa di nos dushi isla.
