Anualmente riba Dia Mundial di Awa (22 di maart) mundo ta enfoca riba e importancia di awa. E aña aki Gobierno di Aruba y WEB Aruba a haci uzo di e oportunidad pa firma un acuerdo pa explora e posibilidadnan pa ofrece awa special pa agricultura den un forma sostenibel y pagabel. Un actor importante den realisacion di e proyecto ta Departamento di Agricultura, Cria y Pesca (Santa Rosa). E acuerdo ta resultado di Gobierno su esfuerso pa fomenta desaroyo di Sector Primario, entre otro di agricultura local.
Como parti di e esfuerso aki, Minister di Sector Primario Chris Romero ta busca solucionnan pa distribucion di awa pa agricultornan local, na un tarifa mas abou cu esun actual pa agricultornan. Hunto cu WEB Aruba lo inventarisa tur e aspectonan cu ta influencia e disponibilidad di awa agricola. Asina lo explora kico ta e calidad y cantidad minimo rekeri pa awa agricola. Tambe ta importante pa haña un bista di e recurso y infrastructura actual di agricultornan pa ricibi awa special, cual lo no ta e awa cu normalmente ta sali for di cranchi. Pa haña informacion realistico y actual, pronto lo organisa encuentronan cu agricultornan local.
Preliminary Agricultural Water Roadmap
Basa riba e resultado di e inventarisacion, lo formula un plan preliminario pa WEB Aruba studia e diferente opcionnan pa posibel distribucion di awa agricola. E plan lo inclui e calidad y cantidad minimo necesario pa awa agricola, pero tambe lo identifica e gruponan meta y nan rol y responsabilidadnan. Cu e resultado di e ‘Water Roadmap’, WEB Aruba lo explora e opcionnan cu ta economicamente factibel riba termino cortico, medio y largo. A planea pa finalisa e plan preliminario dentro di 3 luna.
Naturalesa pa Awa
E iniciativa pa bini cu un solucion pa awa agricola ta cuadra cu e tema di Dia Mundial di Awa 2018, cual ta ‘Naturalesa pa Awa’. UNESCO e aña aki a scoge e tema aki pa explora solucionnan di naturalesa pa e retonan di awa cu nos ta enfrenta den siglo 21.
E acto di firmamento di e acuerdo a tuma lugar na Santa Rosa den presencia di Minister di Sector Primario, sr. Chris Romero, CEO di WEB Aruba, sr. Luis Oduber y directora di Santa Rosa sra. Nathalie Maduro. Tambe tawata presente representantenan di agricultornan local.
Oradornan durante e ceremonia:
- Minister Chris Romero, minister di Transporte, Comunicacion y Sector Primario
- Luis Oduber, CEO WEB Aruba
Nathalie Maduro, directora Dep. Di Agricultura, Cria y Pesca
