Tabata tin un desacuerdo di opinion dos siman entre sindicato SADA y Gobierno. Segun presidente di e sindicato di Douane, Edward Maduro, nan tabata en espera di un update di un convenio cu nan a firma na 2017, pa ser exacto dia 21 di Juli, unda cu nan a firma pa un functiehuis nobo pa loke ta trata Douane, cu mester a drenta na vigor 1 di Januari 2018.
Dia 8 di Januari a pidi e minister un update di esaki, pero no por a duna un splicacion y ningun update, pasobra segun su persona, e no a haya nada e tempo ey. Pero despues di a manda un carta di un update riba esaki, a yama un reunion dia 1 di Februari, mirando cu no tabata haya ningun contesta. Miembronan a dicidi e momento ey pa entrega carta na e minister, di cual a haci esey e mesun dia, en espera di un contesta riba esaki, cual nan a spera mas tarda 8 di Februari. Lamentablemente a yega te dia 9 di Februari. Segun cu tin di compronde, tabata tin un mal comprondemento, pero diabierna atardi mes, dia 9, minister a yama e sindicato pa un reunion urgente, cu tanto departamento di Directie Wetgeving y Departamento di Recurso Humano, hunto cu minister y e director di Douane, pa asina duna un splicacion y un update riba esaki. A bin haya tende di gobierno cu nan ta respeta e convenio cu a wordo firma e dia eynan, cual ta un contesta cu tabata pidi pa algun dia caba. Eynan, e momento ey e minister en cuestion a confirma na e sindicato cu e convenio ta wordo respeta y ehecuta.
A bay cerca e miembronan bek den un reunion, pa asina splica e proceso den su totalidad. A manda un carta cu deadline pa asina esaki wordo ehecuta, pero 1 di Maart 2018, pero tambe a bisa cu ta dispuesto pa papia, pasobra no sa precies con e situacion tin cu cana. Esey tabata e meta di e reunion cu e minister dia 9 di Februari, unda cu a splica den detaye, hunto cu e otro departamentonan, den ki direccion y con largo esaki lo dura. Por bisa cu wetgeving di su parti a bisa cu nan ta kere cu pa Juni nan lo ta full cla cu e parti legislativo y akinan e ora a informa e miembronan di esaki, unda cu nan a bay di acuerdo. Nan a compronde e punto di bista y mirando cu e minister tambe a pidi e sindicato di su banda pa pidi disculpa na e miembronan, mirando cu e no a contesta, etc. a informa esaki y akinan ta caminda cu e miembronan a bay di acuerdo cu te hasta duna un luna mas di speling. Nan a duna te cu dia 1 di Juli 2018 pa esaki wordo ehecuta.
Esey ta e parti di Douane Ambtenaarnan. E convenio tabata di dos aspecto. E aspecto di Douane Ambtenaarnan y esnan uniforma y tambe e poder administrativo, cu tambe tin un acuerdo firma aña pasa cu minister Bermudez, unda cu esey si no a haya un contesta riba dje. A duna e minister ta cu dia 28 di Februari, pa duna un contesta si gobierno lo ehecuta esaki.
Por a tende den prensa cu minister a bisa cu si bay duna e 29 ambtenaarnan aki loke a acorda, e otro 2 pa 3 mil ambtenaarnan tambe tin derecho di haya un aanspraak riba esaki, cual e sindicato no ta comparti e sentimento aki.
