Diahuebs atardi Alton Paas hunto cu otro personanan cu limitacion fisico a yega hunto pa core cu scooternan pa test con facil of dificil ta pa core rond cu un rolstoel.
E bishita di Alton Paas di Corsou hunto cu su mama tabata uno special, unda cu a participa den e actividad di “Mi wiel tambe ta conta”. A organisa e actividad di core banda di area di hotel cu clientenan di Maris Stella y Funari uzando rolstoelnan di coriente.
Parlamentario di Fracccion di AVP, Robert Candelaria, ta gradicido na Hyatt Regency p’e cooperacion cu nan a ricibi, unda cu e personanan cu limitacion por a crusa den e hotel y hasta a haya algo di come. Loke a sorprend’e den un forma positivo ta cu tur instancia cu a acerca tabata cla pa yuda. Un grupo di hendenan grandi, grupo di hende cu limitacion fisico a pasa un momento agradabel, mira bahada di solo, socialisa y come cu otro. E resultado di esaki a pone cu tur esunnan envolvi tabata satisfecho cu e parti social.
Tambe tabata premira p’e dos charla cu tabatin, e parti mas oficial y e Parlamentario a spera cu tur esaki por tin un efecto positivo pa comunidad di Aruba. Pronto oficialmente lo tin e carchinan di parkeer pa esunnan cu tin limitacion fisico. A tene cuenta pa esunnan cu tin menos mobilidad y a evalua nan calidad di bida pa biba manera tur otro hende.
Geraldine Coutinho, Associate Director of Sales and Events na Hyatt Regency, a expresa su gratitud pa e oportunidad cu Aruba a brinda e hotel pa establece 28 aña pasa. Ta cu esey den mente nan semper ta cla pa por comparti bek cu e comunidad tambe. Na momento cu a ricibi e peticion pa yuda, di biaha a bay di acuerdo. Esaki pa motibo cu tur cos tin di haber cu obranan caritativo, hendenan di edad of mucha, semper ta dispuesto pa yuda.
Den e mundo aki tin hopi mas hende di edad, asina doño di Scootmobiel Service Aruba, Donald Gonsalves indica, kende ta biba na Spaña. E ta na Aruba pa mas di 1 aña y a bin cu 100 scootmobiel pa yuda esunnan cu limitacion fisico move. Tur hende di edad kier ta independiente y no kier pa otro hende yuda nan, pero aki na Aruba tur cos ta diferente. Famia kier yuda pero na Europa e hendenan grandi mes tin cu move. Esey ta pone cu scootmobiel ta masha anima. E compania tin 500 di scootmobiel den exterior cu nan por huur, pero e meta cu e tin ta pa bin cu esaki na Aruba.
El a expresa cu a acerca Gobierno, pero cu mester adapta e luga unda por move cu scootmobiel. E proyecto aki ta chikito di cual e ta pusha p’e y ta kere cu Gobierno tambe mester yuda. A haci e actividad aki unda cu Gobierno por mira cuanto hende ta depende di rolstoel. Pa esunnan cu limitacion fisico tambe por disfruta, mester percura pa haci algo pa nan. Mester crea e infrastructura y opcion pa nan por move liber y sin strobamento.
