Diabierna ultimo a celebra dia internacional di Adultonan Mayor na Cas di Cultura. Grupo Nucleo, cu ta consisti di mas cu 50 diferente organisacion di nos grandinan como miembro a celebra dia Internacional di Adultonan Mayor na un manera magnifico.
E celebracion tabata fenomenal, yena cu dushi ambiente, shownan di canto, baile y comedia masha alegre y bon humor.
A nota e felicidad den expresion riba cara di cada un di e adultonan mayor presente. Alabes a reconoce varios di nan cu a destaca pa nan trabounan den comunidad.
Prome Minister mr. Evelyn Wever Croes y Minister Ursell Arends a hiba palabra y a gradici tur nos grandinan cu a construi na desaroyo y crecemento di nos pais. Gobierno di Aruba ta dedica henter luna di october como luna di nos adultonan mayor.
E compromiso di Gabinete Wever-Croes II ta brinda nos adultonan mayor sosten y miho calidad di bida posibel durante e proximo 4 añanan, por medio di un Minister special dedica na Ouderen Zaken.
Gobierno ta felicita e organisacion cu e programa asina fabuloso y ta felcita e adultonan mayor pa cu e luna di october dedica specialmente na nan honor. Masha pabien y cu Dios sigi bendiciona nos dushi grandinan.
