Gobierno di Hulanda ta garantisa mas specialista- y nursenan pa Caribe Hulandes

1532

Gobierno di Hulanda ta recluta extra personal medico pa Aruba, Corsou y Sint Maarten pa por yuda combati plamamento di Coronavirus. Tanto na Aruba como na Sint Maarten e cantidad di casonan positivo a aumenta drasticamente y a bira preocupante!

Den un carta cu minister Hugo de Jonge, encarga cu maneho di Salud Publico, Bienestar General y Deporte di Hulanda, a manda pa Parlamento, el a informa nan cu e siman aki ainda a spacha un Specialista di combatimento di enfermedadnan infeccioso mas 8 nurse pa Sint Maarten. A huur nan servicio via un compania internacional, pasobra Hulanda mes tin scarsedad di personal medico. Si a manda un “crisiscoordinator” for di Hulanda pa por acesora Sint Maarten pa identifica e fuente di e virus y pa realisa e proceso di contact tracing. Na e momento aki, desde dia 16 di juli ultimo, e casonan a redobla for di 79 pa 160 caso positivo.

Den su carta, e mandatario Hulandes a señala tambe a aumento drastico di casonan positivo na Aruba, cu den algun dia a subi cu mas di 200 caso! Mientras cu diadomingo ultimo Hulanda a anuncia conseho negativo di biahe pa Sint Maarten, ainda no a haci esaki pa Aruba. Asina mes e minister a skirbi “Nos tin contacto semanal cu e islanan pa analisa e consecuencianan pa transporte aereo”. 

Ta haci un apelacion serio na tur esunnan cu biaha for di Sint Maarten (y otro destinacionnan di risico) pa Hulanda, pa drenta cuarentena di 14 dia asina cu nan yega. Desde siman pasa a institui un caya specia den aeropuerto Schiphol, unda tur pasahero cu yega for di un area di risico, sea cu nan tin sintoma of no, cu nan mester haci un PCR test.

Minister de Jonge di Hulanda a anuncia cu ta yegando na un acuerdo nobo cu un compania “medisch uitzendbureau” for di Merca, pa por garantisa suficiente personal den Intensive Care Units riba tur e islanan den Caribe Hulandes, pa e fin di aña aki y tambe pa cuminsamento di otro aña!