Gobierno di Corsou ta trahando riba un “steunpunt” pa por yuda e hendenan cu ta perde trabao masalmente. Por imagina cu e cos aki tin un impacto financiero, pero tambe psicologico, socialmente, pa wak con ta haci yuda e hendenan cu ta perde trabao pa nan por pasa e periodo aki na un manera toch menos pisa posibel, segun Hensley Koeiman, minister di desaroyo social, labor y bienestar di Corsou.
E ta sigui splica cu no ta algo facil y mester demostra cu ta care pa nan. Wak con pa yuda nan mas tanto posibel.
Placa perdi
No ta trata aki di cen perdi, segun e mandatario. E tin di compronde cu ministerio di economia a haci un calculacion di e cen cu a hinca den InselAir, esta e 33 miyon, kico el a nifica pa e economia na Corsou.
E ora tin cu laga nan bolbe sak’e pa mustra, pasobra ta cen di pueblo a hinca den e proyecto aki y mustra kico tabata e consecuencia di a hinca 33 miyon, pa e tempo ey yuda InselAir.
Water naar de zee brengen
Parlamentario Gilbert “Gibi” Doran, tin un otro pensamento riba esaki. El a comenta cu ora a tuma nota di e cen aki, tabata semper bay “water naar de zee brengen”, mirando e hecho cu no tabata tin un luz positivo ta briya na horizonte cu por bisa tabata rendabel pa scapa e compania.
Esey ta e lastima cu e ta haya. A uza e palabra di conectividad na diferente ocasion, pero ora bay wak den pasado, tambe tabata tin companianan manera DCA, cual porcierto e mesun gobierno aki no a haci e aanstaltenan pa por a scap’e. Awor ta mira cu a hinca asina tanto cen den un compania cu for di inicio tabata mira cu no tin scapatorio p’e.
Responsabilidad
Como fraccion, MFK lo bay pidi responsabilidad di parti di gobierno. Muy en especial basa riba kico nan a bay ariba. Esey ta loke nan kier sa. A hinca e cantidad di cen ey. A bisa den reunion na momento cu a reuni pa pasa e cantidad di cen ey, cu ta pa netamente conectividad y pa scapa cupo di trabao. No a dura ni dos siman despues cu a pasa e cantidad di cen, cu a kita 250 hende for di trabao, y despues a kita mas.
E ora bo ta puntra unda e cen a bay. Ta berdad pa scapa cupo di trabao y scapa conectividad, of e cen a bay otro caminda. Esey kier haya un contesta p’e, segun Doran.
E responsabel awor aki ta gobierno, segun Doran.
Etienne Ys ta esun cu a negosha pa yega na posibel cumpradornan. Segun Doran, tur hende sa cu sr. Etienne Ys, ta forma parti di e partido cu ta na cabes di e gobierno actual. Tin di compronde si cu el a cobra e cifra di mas abao pa loke ta trata un consultant. Esey tin cu haya proba, segun Doran.
