E ladronnan tabata activo marduga diaranson. Banda di 3or a manda un truck grandi cu a ser horta riba e super mercado Hua Run na Ponton.
Polis a ser avisa pa bay pura na e sitio. Testigonan cu a mira a bati alarma. Dos ladron a yega cu e truck y manda esaki den direccion di e entrada di e supermercado. E tin un hekwerk dilanti pero asina mes a purba usa e truck pa destrui e entrada. Hendenan cu a scucha e desordo a mira kico ta pasando. Hasta a dal un grito masha duro pa asina hala atencion di ambos ladron. Nan tabata tin capuchon riba cabes. Parce nan no a logra drenta y horta pasobra a sinti nan mes descubri.
Nan a core bay den direccion di un otro auto cu tabata wardando riba nan. Ta un jeep cu tabata cendi cu mas hende aden ta standby. Polisnan a yega haya e truck para dilanti e supermercado. A cuminsa un investigacion mesora y notifica tambe recherche y cuerpo tecnico.
Den pasado via e mesun entrada aki ladronnan a purba horta y polis a gara dos di nan man den masa. E biaha aki nan a logra scapa pasobra algun persona atento a dal dos grito spantanan y bati alarma. Bomberonan a presenta pasobra e truck tabata tin motor cendi. E tabata traha halto y hendenan a kere cu e lo bay explota of pega candela.
