Recientemente diputado James Kroon a tuma despedida di Alfredo Koolman. A yama e ehecutivo Rubiano masha danki pa tur e añanan di servicio na WEB Bonaire. Bestuurscollege di Boneiro ta considera Koolman como un hende cu hopi perseverancia y dedicacion cu a logra haci hopi cambio den infrastructura di awa y coriente na e isla di flamingo.
James Kroon a bisa den su discurso cu e ta consciente cu Alfredo Koolman a crea hopi cupo di trabou door di implementa proyecto di innovacion, teniendo cuenta cu e crecemento di e poblacion. Diputado Kroon a desea Alfredo Koolman tur cos bon den su reto nobo na WEB Aruba N.V..
Alfredo Koolman, director saliente di WEB Bonaire a anuncia su retiro na maart ultimo y cu a drenta na vigor desde dia 5 di mei 2022. Hunta di comisario di WEB Bonaire a enfatisa cu el a desplega un papel importante den crecemento di e organisacion. WEB Bonaire N.V. a yam’e danki pa e 9 añanan cu el a duna e compania y pa e exitonan cu el a alcansa. Hunto cu e team ehecutivo y cu personal di WEB, el a inicia y implementa un reorganisacion importante na aña 2013. E tabata e motor tras di proyectonan grandi den WEB, manera e planta nobo di awa di bebe, e tanki di awa nobo na Sero Largo, e implementacion y reparacion di tuberianan di irigacion y reparacion di e planta di awa preto (RWZI), e contractnan cu Contour Global y e strategia di WEB 2025 cu ta contene e plannan pa e transicion energetico pa Boneiro.
Den e siguiente simannan Alfredo Koolman lo tuma e timon over na WEB Aruba N.V. Pa e storia completo y pa sa mas di Alfredo Koolman, lesa e edicion di TREMPAN di mañan dialuna.
