Diahuebs ultimo Departamento di Asuntonan Economico, Comercio y Industria a firma un acuerdo di cooperacion cu Camara di Comercio, Aruba Trade and Industry Association y Free Zone Aruba NV pa asina formalisa e Aruba Trade Board.
Esaki ta un cooperacion entre e organisacionnan aki pa asina sostene comercio local cu kier haci negoshi pafo di Aruba. Parti di e cooperacion tambe ta pa sostene e diversificacion di e economia di Aruba door di atrae inversionnan di calidad y innovacion den sectornan economico nobo. Departamento di Relacionnan Exterior tambe ta forma un rol importante den e cooperacion aki.
Di hopi tempo caba, den un manera inoficial, e organisacionnan aki ta traha hunto den Aruba Trade Board pa agrupa nan conocemento y experticio pa trece oportunidadnan di negoshi y comercio pa nos companianan local y ta traha hunto pa profila Aruba na inversionistanan stranhero potencial. Cu e formalisacion aki, e plataforma di Aruba Trade Board lo tin mas autoridad pa agrupa nan trabaonan, realisa tareanan y organisa actividadnan cu lo yuda empresarionan local haci negoshinan nobo cu otro pais(nan)nan y atrae inversionnan den sectornan economico nobo.
Cu e formalisacion aki tambe gobierno di Aruba ta cumpli cu e proposicion di e Masterplan ‘Repositioning our Sails’ pa duna e economia di Aruba durante e pandemia aki un impulso. Ademas ta cumpli cu e accion delinea den e Plan Strategico Nacional di Aruba pa formalisa un Aruba Trade Board.
Riba e potret por mira e miembronan durante e reunion via Zoom cu a formalisa e cooperacion publico-priva.
