Minister di Asuntonan Social y Labor, Glenbert Croes, a reuni cu gerencia di Riu Palace Antillas y a entrega un plakkaat di reconocimento pa ta duna bek na comunidad. A duna e famia di RIU Hotels y gerencia un reconocimento di curason.
Minister Glenbert Croes ta considera cu RIU Hotels a resalta y refleha un sensibilidad social hopi special. “Nos ta reconoce e curason social di oro di hotel RIU bou liderazgo di Juan Blanco”, asina Minister Croes a expresa. E causa social cu e mandatario ta hibando y experenciando na Aruba, nan sa cu e situacion riba tereno social ta dificil y critico.
Tur hende mester duna un man y Gobierno ta haci di su banda. E realidad ta cu unda Gobierno no ta yega, e sector priva ta yega. Minister di Asuntonan Social y Riu Palace Antillas tin un bon relacion, un gran partnership den trahamento hunto pa haci bida di tur famia cu mester un ayudo, un gesto of mester di un milager pasa den nan bida. Cu e apoyo ricibi di RIU Hotels, ta logra haci e milagernan bira un realidad.
Ta gradici e team di Ministerio di Asuntonan Social hunto cu e team di Riu Palace Antillas, pero tambe pa nan esfuerso pa brinda henter comunidad social un futuro nobo.
Gerente General di Riu Palace Antillas, Juan Blanco, ta honra di ricibi e reconocimento aki. E gerente ta orguyoso cu e compania tin un departamento di responsabilidad social cu ta importante. Nan ta percura p’e trabounan comunitario. E plakkaat ta refleha riba nan tur cu ta traha pa esaki. Un di e obhetivonan grandi di Riu Palace Antillas ta responsabilidad social y pocopoco ta cumpli cu esaki.
