Gabinete di Gobernador den un informe na prensa a informa cu despues di a consulta cu diferente lidernan politico, departamentonan y instancianan, e lo apunta un informador cu e tarea pa explora e posibilidadnan di realisa un proximo Gabinete. Algun nomber ta circulando manera di abogado mr. Arie Swaen, sinembargo e informacion aki no ta confirma ainda.
Interesante ta cu Gobernador lo nombra un informador y no un formador. Esaki ta duna indicacion cu Gobernador den su ronda di consulta ta mira mas cu un posibilidad pa yega na un acuerdo di gobernacion.
Den e relato na prensa, Gabinete di Gobernador a indica: “Het doelvan een informatieopdracht is het onderzoeken van bijvoorbeeld de haalbaarheid van bepaalde varianten van de samenstelling van een nieuwe regering”. E pregunta cu pronto lo ser contesta ta si Gobernador lo pidi informador explicitamente pa explora un coalicion MEP-AVP, cual algun comentarista ta kere lo ta un oportunidad unico pa Aruba na e momentonan aki mirando e resultado di eleccion.
Algun a scucha lider di MEP despues di Gobernador declara cu e lo a interesa pa sa di ki forma AVP ta mira un coalicion cu MEP. E palabra base amplio tambe ta wordo menciona continuamente, indicando asina cu un mayoria di solamente un asiento, esta cu MEP y POR solamente den Gabinete, no ta mucho amplio. Pa inclui 3 partido den un coalicion, ta parce di ta mas complica, cu simplemente un majoria di 2 partido cu 18 asiento.
Den pasado a yega di bay den un proceso asina, unda cu Gobernador tabatin un tarea pa explora e opcion aki, cu sinembargo no a logra e tempo ey. Tanto AVP como MEP a culpa e contrapartido di e fracaso aki. E tempo ey e resultado di eleccion tabata similar na esun di awe, MEP tabatin 9 asiento, AVP tabata tin 10 asiento y OLA di Glenbert Croes tabatin 2 asiento.
