Den e trabou di cuido y guia di mucha, musica y canto no ta algo excepcional. Musica ta dushi, muchanan ta gust’e y alabes esaki ta bon pa nan desaroyo. Creatividad ta hunga un rol importante den musica. Pa un mucha esaki ta esencial pa asina su fantasia por amplia y e por expresa esaki den un forma unico di canto y kizas hasta acompaña pa un baile. Meta di e workshop aki ta pa stimula creatividad y arte di musica entre lidernan di Centronan di Cuido cu ta traha cu muchanan di 0-12 aña. Ora un mucha ta toca un instrumento e por yud’e den diferente area di desaroyo, entre otro, su desaroyo motorico pasobra e tin di, por ehempel, tene e instrumento y tin bon coordinacion tocando esaki. Cantando, e ta yud’e den su desaroyo di idioma y si esaki ta sosode den un grupo e ta yud’e den su desaroyo social. Via musica e mucha por expresa su emocion mihor, e musica ta yud’e den e desaroyo emocional. Su desaroyo cognitivo tambe ta wordo stimula na momento cu e mucha tin di concentra y presta atencion na detalles di por ehempel diferente tono, palabra of ritmo di e musica. Den e workshop aki lidernan di Centro di Cuido lo haya tips y ideanan con pa haci e actividad di canto y musica mas atractivo y unico (creativo) posibel pa e mucha. E lo ta un workshop diferente pa asina e lider por haya e toolsnan necesario pa haci nan programa di dia mas atractivo y cu amplio variacion pa e mucha. E fecha cu esaki lo tuma lugar lo ta diasabra 7 di oktober 2017 cuminsando di 9or di mainta te cu 1or di merdia. Cuponan ta limita.Pa mas informacion y inscripcion, tuma contacto cu nos na: 588-0856/583- 4247 of email na [email protected]. Tambe por bishita nos Facebook page of por pasa serca nos na: Cumana #2 (Fundacion Pa Nos Muchanan)
