Awe Aruba tin e compleho di cine mas moderno di Caribe: Gloria. Un proyecto di MetaCorp. E compleho aki ta situa riba Avenida Nelson Oduber (ex Sasakiweg) y di acceso facil pa usuarionan.
Ta exigi solamente un persona of famia cu curashi pa inverti no menos cu 40 miyon florin. Pero pa famia de Veer e ta un regalo na un pueblo cu a apoya nan pa 100 aña. “Ora nos a cuminsa e proceso, nos kier a sigura cu tur loke cu nos ta uzando ta “first class” y tiki tiki e suma a sigui crece. Ora di cana rond y mira e resultado, nos no ta arepenti di e decisionnan cu nos a tuma,” Eddie de Veer, Director di MetaCorp, a duna di conoce.
E proyecto aki a bini na momento cu MetaCorp ta celebra nan 100 aña di existencia na Aruba, un regalo na comunidad.
A cuminsa traha un compleho di cine pa asina acomoda e tecnologia di mas moderno cu tin pero tambe pa celebra 100 aña. Den e proceso a bini mas idea acerca, pa haci e luga un centro total di entretenimento. Asina a bini cu establecimentonan cu ta brinda cuminda saludabel, icecream traha e momento ey, comfort food, pizzeria, y e restaurant PF Cheng.
E salanan ta parti den diferente estilo. Asina tin e “comfort auditorium”, cu conoce awo. Solamente e angulo di e stoel ta diferente, dunando e bista manera cu persona ta sinta den un auditorium mes. Tin cinco di e salanan aki
Tin comfort city, cu ta salanan comparti. E sala aki tin un screen mas grandi cu e comfort auditorium. E tin un tamaño 10 pa 15 meter. Banda di dje tin un VIP Lounge, unda por come y bebe algo, mientras cu ta spera famia of amigonan caba di wak cine. For di eynan por bay pa un di e tres VIP auditoriumnan. Loke ta hala atencion ta cu dos di e auditoriumnan aki ta comparti pantaña cu comfort auditorium. Pues e yiunan ta sinta den sala ariba cu e hobennan ta wak e pelicula, y e mayornan ta sinta abou, den un otro sala y ta mira e mesun pelicula cu e muchanan. Den e VIP ta un experencia completamente diferente unda por come carni, pisca, of otro platonan.
E ultimo sala ta esun cu e screen di Imax, cu ta esun mas grandi den Caribe y ta brinda e cliente un experiencia inolvidabel. E tin un pantaya di 75 pia largo y 40 pia halto, cu un calidad di e proyector cu ta haci un diferencia grandi. E tin un sound system cu ta pone e cliente sinti cualkier sonido a la perfeccion di realidad. Por ehempel tin peliculanan di National Geographic graba cu e Sistema di Imax y cu ta brinda un sistema hopi real pa loke ta sonido.
Trahado
E Proyecto aki ta encera cu mester a busca e personal necesario. E tabata un proceso largo unda a haya mas di 1000 aplicacion. For di e grupo aki a tuma algo mas cu 100 persona pa cuminsa e operacion. Pero unabes cu e vacuna yega, lo por aumenta nan capacidad di espacio y esaki ta nifica cu lo tuma mas hende den servicio.
MetaCorp a crea un area na otro banda di caminda pa clientenan di Gloria. E ta brinda espacio na mas cu 300 auto.
Den cuadro di nan apertura, a regala e prome siman di cine na ciudadanonan di Aruba. Pues e ta habri pa publico en general e prome seis dianan, y ta calcula cu 6000 persona lo por mira pelicula, teniendo cuenta cu tur e reglanan di DIVG. Dia 10 di December ta habri pa publico pa 5’or di atardi.
Eddie de Veer a gradici tur hende cu a yuda realisa e proyecto di Gloria, principalmente nan trahadonan cu a sigui labora den e pandemia. Pero tambe e team cu a carga e proyecto. “Nan enfoke y dedicacion riba e proyecto a logra cu nos a yega unda nos ta awe. Como famia e ta duna nos un satosfaccion di mira un edificio asina bunita ta representa 100 aña vision di un persona 100 aña atras,” de Veer a expresa.
