E comunidad Dominicano na Aruba e aña aki a percura pa ilumina e plasa cu nan mes a diseña y ta mantene na inicio di Caya Roland Lacle banda di Departamento di Salud Publico Aruba. A tene un ceremonia cortico pa celebra e gesto cu e comunidad Dominicano a haci na Aruba, e isla cu a duna nan un oportunidad pa biba, traha y progresa hunto cu nos.
Consul di Republica Dominicana, Pedro Antonio Ventura de la Cruz, hunto cu vice-consul Maria Agramonte, a bishita e plasa pa por cera conoci mas cu e actividadnan diario di e comunidad Dominicano riba nos isla. E consul a splica cu e ta di bishita pa gradici e Dominicanonan cu a haci e gesto aki y tur e compañeronan cu ta representando Republica Dominicana. Presidente di e pais, a encomenda nan pa asina haci un trabao di yuda henter e comunidad Dominicana den nomber di nan pais.
E colonia Dominicano ta un comunidad importante na Aruba. Ventura a splica cu e comunidad semper ta hopi trahado. Como Dominicano, semper nan ta carga nan bandera na halto y na Aruba no ta un excepcion. Semper mester mehora, asina consul Ventura a splica. E gobierno cu nan tin ta uno di cambio. Semper mester mehora algo. Semper ta siña algo y tin cu mehora algo. Den e caso aki lo mehora loke ta pa mehora y semper lo hisa na halto loke a haci pa lo miho.
Ventura ta desea henter e colonia Dominicano un bon pasco y semper lo ta dilanti defendiendo e Dominicanonan cu e bandera den halto y nan tey na Aruba pa haci un bon funcion y yuda tur e Dominicanonan y tambe pakico no, esnan casa cu Dominicanonan, pasobra nan ta parti di nan. E idea ta pa trata di haci lo miho cu e paspoortnan y e documentacionnan ta mas na tempo pasobra tin informacion cu un paspoort ta dura hopi pa yega. Tambe tin planea pa trece e hunta central electoral. Ta plannan cu tin y ta spera cu e gobierno actual di Republica Dominicana yuda y por trece Aruba.
Vice-consul di Republica Dominicana na Aruba, Maria Agramonte a yega nos pais pa prome biaha. Y e ta conta cu ainda e no a tuma e posicion oficialmente pasobra nan ta di turista y conociendo e isla. Agramonte ta sinti su mes honra di ta na Aruba y cu e presidente di Republica Dominicana, Luis Abinader, a tuma nan na cuenta y haci un trabao bunita, na fabor di e rumannan Dominicana na Aruba.
Ta mira cu tin un intension pa haci cambio. Entre e servicionan cu nan tabatin problema cun’e, ta paspoort. Ta dura entre 8 luna y 1 aña pa haya esaki. Pa cedula tambe. Awo a papia cu consul Pedro Antonio Ventura, kende ta e consul nobo y e ta bin cu un programa y cu energia nobo. El a priminti cu esey lo cambia. Incluso desde awo, por mira hendenan riba caya cu el a resolve por medio di dje mes den e poco tempo cu e tey. Por mira cu en realidad, e cambio a yega.
